Forumi i Biznesit dhe Ekonomisë Shqipëri–Slloveni, i mbajtur në Tiranë, shërbeu si një platformë konkrete për thellimin e bashkëpunimit ekonomik mes dy vendeve, duke mbledhur përfaqësues institucionalë, drejtues biznesi dhe investitorë nga Shqipëria dhe Sllovenia.
Moment i rëndësishëm i forumit ishte dhe nenshkrimi i Memorandumit të Mirëkuptimit mes AIDA dhe Spirit Slovenia, me qëllim forcimin e bashkëpunimit në drejtim të shkëmbimit të informacioneve, organizimit të aktiviteteve të përbashkëta dhe rritjes së investimeve në vendet respektive.
Në fjalën e saj hapëse, Drejtorja e Agjencisë Shqiptare të Zhvillimit të Investimeve, Laura Saro, prezantoi panoramën e mundësive që ofron Shqipëria për investitorët e huaj, duke theksuar rolin e AIDA-s si partnere strategjike në çdo fazë të procesit të investimit. Ajo nënvizoi se Shqipëria ofron trajtim të barabartë për investitorët vendas dhe të huaj, procedura të njëjta dhe shërbime të digjitalizuara, duke e bërë procesin e investimit të thjeshtë dhe transparent. “Ne nuk i shohim investitorët si vizitorë, por si partnerë afatgjatë. Jemi këtu për t’ju ndihmuar të gjeni partnerët e duhur, të orientoheni drejt prioriteteve të ekonomisë shqiptare dhe të ktheni interesin tuaj në projekte konkrete,” u shpreh Saro, duke shtuar se profili i larmishëm i ekonomisë shqiptare u lejon investitorëve të gjejnë modele bashkëpunimi të përshtatura sipas interesave të tyre.
Ndërsa Zëvendësministri i Ekonomisë dhe Inovacionit, Enkelejd Musabelliu, ftoi bizneset sllovene të shohin Shqipërinë si një destinacion serioz dhe të besueshëm për investime. Ai vuri në dukje se ekonomia shqiptare ndodhet në një moment kyç zhvillimi, me stabilitet makroekonomik në rritje, normë inflacioni më të ulët se mesatarja e Bashkimit Europian dhe papunësi në nivelin më të ulët historik. Sipas Musabelliut, në tre deri në pesë vitet e ardhshme, ekonomia shqiptare do të pësojë një transformim të thellë si rezultat i procesit të integrimit europian, duke e bërë klimën e biznesit plotësisht të përputhshme me standardet e BE-së. “Ky është një sinjal i fortë për investitorët që kërkojnë stabilitet, rregulla të qarta dhe perspektivë afatgjatë,” theksoi ai.
Përfaqësuesit e institucioneve dhe komunitetit të biznesit slloven theksuan rëndësinë e bashkëpunimit dypalësh dhe shprehën gatishmërinë për të ndarë eksperiencën e tyre nga anëtarësimi në Bashkimin Europian, veçanërisht në sektorë kyç të zhvillimit ekonomik. Një vëmendje e veçantë gjatë forumit iu kushtua edhe rolit të Inteligjencës Artificiale, si një fushë me potencial të lartë për projekte të përbashkëta dhe inovacion në të ardhmen.
