Val di Funes, në provincën veriore të Tirolit të Jugut në Itali, është e njohur për bukurinë e saj idilike. Lugina e gjelbëruar, me shtëpitë alpine të grumbulluara, shtrihet poshtë majave të mprehta të Odle Peaks, një sfond madhështor që në perëndim të diellit merr nuanca të ndritshme portokalli-pjeshke.
Tërheqja estetike e zonës nuk ka kaluar pa u vënë re nga përdoruesit e rrjeteve sociale. Vitet e fundit, ajo që dikur ishte një destinacion i preferuar për ecje në natyrë është përmbytur nga vizitorë ditorë që shtyhen për të kapur foton perfekte për Instagram.
Fotografët janë përqendruar veçanërisht te dy kisha piktoreske – Santa Maddalena dhe San Giovanni di Ranui.
Në vitin 2022, pronari i livadhit përreth kësaj të fundit instaloi një turniketë me pagesë për hyrje, për të menaxhuar numrin e turistëve që kalonin nëpër tokën e tij.
Tani ka ndërhyrë edhe bashkia e Funes. “Kemi mjaftuar nga grupet turistike nga Kina dhe Japonia që zbresin në luginë, parkojnë pa kriter dhe qëndrojnë vetëm aq sa të bëjnë disa foto. Ata nuk kontribuojnë në asgjë, përveç mbeturinave që lënë pas,” i tha kryetari i bashkisë, Peter Pernthaler, mediave lokale.
Këshilli bashkiak ka njoftuar se do të kufizojë aksesin në kishën Santa Maddalena, e cila ndodhet në fund të një rruge të ngushtë, nga maji deri në nëntor.
Lugina italiane do të kufizojë aksesin turistik në kishën e famshme në Instagram
“Banorët vendas kanë arritur në pikën e durimit, ndaj kemi vendosur të veprojmë. Jemi të gatshëm të bëjmë më shumë: këtë vit nuk do të lejojmë një pushtim,” tha Pernthaler.
Vendimi vjen pasi banorët kanë shprehur frustrim për trafikun dhe turistët që zënë vendparkimet e qytetit dhe shkelin në toka private.
Nga muaji maj, një barrierë do të kufizojë aksesin në rrugën që të çon drejt kishës Santa Maddalena dhe disa banesave, duke e lejuar kalimin vetëm për banorët dhe mysafirët e hoteleve.
Turistët do të duhet të parkojnë në një zonë të caktuar. Kur ajo të mbushet, automjetet do të drejtohen drejt vendparkimeve më poshtë në luginë.
Pernthaler ka sqaruar se nuk do të ketë një sistem rezervimi për zonën e parkimit. Tarifa e parkimit pritet gjithashtu të rritet. Aktualisht, kushton 4 euro për gjithë ditën, çmim që, sipas kryetarit të bashkisë, është shumë i ulët për të dekurajuar turistët që ndalojnë vetëm për një foto të shpejtë.
Ai shtoi se këshilli bashkiak është në bisedime me bashkinë fqinje të Chiusa-s për të organizuar një shërbim autobusi (shuttle).
Pika e famshme e fotografimit pret deri në 600 vizitorë në ditë
Lajmi për kufizimin e aksesit në kishë është raportuar gjerësisht, por Pernthaler thekson se kjo nuk është një masë kundër turizmit.
“Barriera tashmë ekziston dhe ne duam ta zhvendosim në qendër të Santa Maddalena-s, aty ku ndodhet kisha e vogël, në mënyrë që turistët të mos mbërrijnë me makinë, por në këmbë,” i tha ai medias lokale Il Dolomiti.
“Rruga në Santa Maddalena është shumë e ngushtë dhe e vogël, dhe ne, si bashki, duhet të zbatojmë të gjitha zgjidhjet e mundshme për të siguruar që si banorët, ashtu edhe turistët, të lëvizin lirshëm dhe pa u bllokuar në trafik,” shtoi ai.
“Na duhet rregull, si për ata që jetojnë këtu, ashtu edhe për ata që duan të vijnë, të bëjnë foton klasike dhe të largohen.”
Pernthaler thotë se deri në 600 vizitorë mund të vijnë brenda një dite të vetme. Ai e pranon se kjo është shumë për një qytet të vogël, por shton: “Jemi mësuar me këtë. Për dekada me radhë, lugina jonë ka qenë e famshme në mbarë botën për bukurinë e saj dhe e dimë që njerëz vijnë nga çdo cep i globit.”
Besohet se fama e Val di Funes në platformat sociale u nxit në Kinë, kur kisha Santa Maddalena u shfaq në kartat SIM të një operatori kinez në vitin 2005.
Në të gjithë Dolomitet, komunitetet po përballen me një fluks të madh turizmi, për të cilin banorët kanë frikë se do të shtohet edhe më shumë me afrimin e Lojërave Olimpike Dimërore./Përshtati nga Euronews, ekofin.al
