Drejtoria e Përgjithshme e Doganave do të ketë një drejtues të ri. Pas vetëm 10 muajsh në detyrë, Besmir Beja largohet nga posti i drejtorit të përgjithshëm, ndërsa në vend të tij është përzgjedhur Fation Shehu, një emër me eksperiencë në strukturat e luftës kundër kontrabandës.
Emërimi i Shehut është propozuar për miratim në mbledhjen e sotme të Këshillit të Ministrave, duke sjellë një ndryshim në drejtimin e një prej institucioneve më të rëndësishme për administrimin e të ardhurave të buxhetit të shtetit.
Fation Shehu ka mbajtur për katër vite detyrën e drejtorit të Antikontrabandës në administratën doganore, ku ka drejtuar strukturat përgjegjëse për parandalimin dhe goditjen e kontrabandës dhe veprimtarive të paligjshme në fushën doganore.
Gjatë kësaj periudhe, ai është vlerësuar edhe në nivel ndërkombëtar. Në vitin 2025, Shehu u nderua me Çmimin e Parë nga SELEC (Qendra për Zbatimin e Ligjit në Evropën Juglindore), për arritjet në luftën kundër kontrabandës dhe krimit të organizuar.
Drejtuesi i ri i Doganave ka gjithashtu eksperiencë profesionale dhe trajnime të zhvilluara në bashkëpunim me organizata ndërkombëtare të zbatimit të ligjit.
Ndërkohë, largimi i Besmir Bejës vjen pas një periudhe relativisht të shkurtër në drejtimin e administratës doganore. Ai qëndroi në këtë pozicion për rreth 10 muaj, ndërsa ndryshimi në krye të institucionit duket se lidhet me vlerësimin e performancës së tij. Megjithatë, deri më tani nuk ka një shpjegim zyrtar publik mbi arsyet konkrete të largimit.
Ndryshimi në drejtimin e Doganave vjen në një periudhë kur administrata doganore përballet me objektiva të rëndësishëm për realizimin e të ardhurave buxhetore, forcimin e kontrolleve ndaj kontrabandës, përmirësimin e administrimit dhe përafrimin e procedurave doganore me standardet e Bashkimit Evropian.
Emërimi i një drejtuesi që vjen nga strukturat e Antikontrabandës mund të sinjalizojë një fokus më të madh në forcimin e kontrolleve dhe luftën kundër informalitetit në tregtinë e mallrave./ekofin.al
