Një pagë e vetme nuk mjafton për të përballuar qiranë e një apartamenti me tri dhoma gjumi në qendër të shumë qyteteve europiane. Euronews Business analizon se sa para i mbeten një çifti që punon pasi paguan qiranë.
Shumë vende europiane po përballen me një krizë strehimi, të karakterizuar nga mungesa e banesave dhe rritja e çmimeve. Edhe qiratë vazhdojnë të shtrenjtohen, veçanërisht në qendrat e qyteteve. Për shumë familje europiane, një pagë e vetme nuk mjafton më për të mbuluar qiranë e një apartamenti familjar në zemër të një qyteti të madh.
Por çfarë ndodh nëse të dy partnerët punojnë dhe e ndajnë koston e qirasë? A mjaftojnë të ardhurat e tyre? Sa para u mbeten çdo muaj pas pagesës së qirasë? Dhe si krahasohen qytetet europiane me ato në pjesën tjetër të botës?
Raporti Mapping the World’s Prices 2026, i publikuar nga Instituti i Kërkimeve i Deutsche Bank, jep një panoramë të kësaj situate.
Analiza merr në konsideratë dy persona që fitojnë nga një pagë neto mesatare në qytetin përkatës dhe nga të ardhurat e tyre të përbashkëta zbret qiranë e një apartamenti me tri dhoma gjumi në qendër të qytetit. Shuma e mbetur përfaqëson të ardhurat e disponueshme të familjes pas pagesës së qirasë.
Në 28 qytetet europiane të përfshira në analizë, të ardhurat e disponueshme pas qirasë variojnë nga vetëm 253 euro në Lisbonë në 9,140 euro në Zyrih.
Qytetet zvicerane kryesojnë renditjen
Zyrihu ka qiranë më të shtrenjtë ndër 28 qytetet e analizuara, me 5,502 euro në muaj. Megjithatë, ai ka edhe pagën neto më të lartë, prej 7,321 eurosh. Si rezultat, një çifti që punon në Zyrih i mbeten 9,140 euro në muaj pas pagesës së qirasë, më shumë se në çdo qytet tjetër.
Krahas Zyrihut, edhe Gjeneva qëndron shumë përpara qyteteve të tjera. Një çifti në Gjenevë i mbeten 8,783 euro çdo muaj pas qirasë, falë pagës së dytë neto më të lartë në renditje, prej 6,516 eurosh.
Në vendin e tretë renditet Luksemburgu, me 5,890 euro të mbetura pas qirasë. Qyteti ka pagën e tretë neto më të lartë, prej 4,548 eurosh. Edhe pse qiraja është e lartë, rreth 3,206 euro, ajo mbetet më e ulët se në qytete si Londra, Dublini dhe Amsterdami. Kjo u mundëson çifteve të kenë më shumë të ardhura në fund të muajit.
Pas Luksemburgut renditet Birminghami, me 5,238 euro, duke lënë pas me një diferencë minimale Kopenhagën, ku një çifti i mbeten 5,233 euro.

Birminghami kundrejt Londrës: Diferencën e bën qiraja
Një çifti në Birmingham i mbeten 5,238 euro çdo muaj pas pagesës së qirasë, ndërsa në Londër vetëm 3,148 euro. Kjo do të thotë se çiftet në Birmingham kanë 2,090 euro më shumë në dispozicion çdo muaj.
Megjithëse pagat janë më të ulëta në Birmingham, qiratë janë ndjeshëm më të lira. Një apartament në qendër të qytetit kushton 1,949 euro në muaj, krahasuar me 4,362 euro në Londër.
Më shumë se 4,000 euro në muaj pas qirasë u mbeten çifteve edhe në Oslo (4,936 euro), Frankfurt (4,786 euro), Mynih (4,575 euro) dhe Amsterdam (4,431 euro).
Amsterdami është ndër pesë qytetet me qiratë më të larta, mesatarisht 3,542 euro në muaj, por paga e lartë neto prej 3,986 eurosh e kompenson këtë kosto.
Edhe Vjena (3,709 euro) dhe Stokholmi (3,674 euro) regjistrojnë nivele relativisht të larta të të ardhurave të mbetura pas qirasë.

Berlini lë pas Parisin falë qirave më të ulëta
Pagat në Paris janë më të larta se në Berlin, përkatësisht 3,171 euro kundrejt 2,946 eurove neto në muaj.
Megjithatë, çifteve në Berlin u mbeten më shumë para pas pagesës së qirasë: 3,554 euro, krahasuar me 3,336 euro në Paris.
Arsyeja është diferenca në koston e strehimit. Një apartament në qendër të Parisit kushton 3,005 euro në muaj, ndërsa në Berlin 2,339 euro.
Dublini ka një pagë neto më të lartë, prej 3,455 eurosh, sesa Parisi, Berlini, Vjena dhe Stokholmi. Megjithatë, çifteve në kryeqytetin irlandez u mbeten më pak të ardhura pas qirasë se në të gjitha këto qytete, vetëm 3,038 euro.
Qiraja në Dublin është e katërta më e lartë në Europë, me 3,873 euro në muaj, duke tejkaluar vlerën e një page neto.
Europa Jugore në fund të renditjes
Qytetet e Europës Jugore kanë nivelet më të ulëta të të ardhurave të disponueshme pas pagesës së qirasë.
Lis bona dhe Milano rezultojnë qytetet ku çiftet përballen me vështirësitë më të mëdha për të mbuluar kostot e strehimit.
Në Lisbonë, një çifti i mbeten vetëm 253 euro në muaj pasi paguan qiranë. Paga neto është 1,408 euro, ndërsa qiraja e një apartamenti me tri dhoma gjumi në qendër arrin në 2,561 euro.
Në Milano, shuma e mbetur është vetëm 697 euro.
Në Madrid, një çifti i mbeten 1,905 euro çdo muaj, ndërsa në Barcelonë 1,832 euro. Kjo shumë zbret në 1,265 euro në Romë dhe 1,148 euro në Athinë.
Në kryeqytetin grek, qiraja mujore prej 1,164 eurosh është pak më e lartë se një pagë neto, e cila arrin në 1,156 euro.
Stambolli renditet menjëherë pas Lisbonës në fund të listës europiane, me vetëm 353 euro të mbetura pas qirasë. Paga neto në qytet është 1,027 euro, ndërsa qiraja arrin në 1,701 euro.
Europa Qendrore dhe Lindore paraqitet më mirë se Jugu
Disa qytete të Europës Qendrore dhe Lindore kanë një pozicion më të favorshëm sesa qytetet e Europës Jugore.
Në Pragë, një çifti i mbeten 2,054 euro pas pagesës së qirasë. Në Varshavë, kjo shumë arrin në 1,985 euro, ndërsa në Budapest në 1,548 euro.
Të tria këto qytete renditen më mirë se Roma dhe Athina.
Megjithatë, duhet theksuar se analiza merr në konsideratë vetëm shpenzimet për qiranë. Çiftet duhet të përballojnë gjithashtu kostot e ushqimit, faturave të shërbimeve dhe transportit.
A mjafton një pagë për të paguar qiranë?
Në shumë qytete europiane, përgjigjja është jo.
Në 11 qytete, qiraja e një apartamenti me tri dhoma gjumi në qendër është më e lartë se një pagë neto mujore.
Këto qytete janë Athina, Barcelona, Budapesti, Dublini, Stambolli, Lisbona, Londra, Madridi, Milano, Praga dhe Roma.
Lis bona ka diferencën më të madhe. Paga neto mujore është 1,408 euro, ndërsa qiraja kushton 2,561 euro, ose 82% më shumë se një pagë e vetme.
Në Milano, paga neto është 1,940 euro, ndërsa qiraja mujore arrin në 3,184 euro.
Në Pragë dhe Budapest, vlera e qirasë dhe ajo e një page neto janë pothuajse të barabarta.
Si krahasohet Europa me pjesën tjetër të botës?
Qytetet europiane paraqiten mirë në renditjen globale.
Zyrihu, me 9,140 euro të mbetura pas qirasë për një çift, dhe Gjeneva, me 8,783 euro, kryesojnë listën e 69 qyteteve të analizuara në mbarë botën.
Të dyja qëndrojnë përpara San Franciskos, ku një çifti i mbeten 7,992 euro çdo muaj.
Shtatë nga dhjetë qytetet me të ardhurat më të larta të disponueshme pas qirasë ndodhen në Europë.
Asnjë qytet europian nuk gjendet mes dhjetë qyteteve të fundit të renditjes globale. Këto qytete ndodhen në Amerikën Latine, Azi dhe Afrikë.
Në gjashtë prej tyre, qiraja është më e lartë se dy paga neto të marra së bashku.
Në fund të renditjes janë Manila, ku një çift regjistron një deficit mujor prej 882 eurosh pas pagesës së qirasë, dhe Bangkoku, me një deficit prej 759 eurosh.
Në Moskë, një çifti i mbeten vetëm 313 euro pas qirasë. Paga neto është 1,570 euro, ndërsa qiraja mujore arrin në 2,827 euro.
Ndërkohë, disa qytete europiane paraqiten më mirë edhe se Nju Jorku, ku një çifti i mbeten 1,921 euro në muaj pas pagesës së qirasë./Përshtati nga Euronews. ekofin.al

