Vendet e BE-së kanë rënë dakord për një paketë masash që synon forcimin e autoritetit mbikëqyrës të tregjeve financiare të bllokut, gjatë një takimi të ministrave të Financave të zhvilluar të premten në Luksemburg.
Paketa për Integrimin dhe Mbikëqyrjen e Tregjeve (Market Integration and Supervision Package – MISP) do t’i japë Autoritetit Evropian të Letrave me Vlerë dhe Tregjeve (ESMA) kompetenca të drejtpërdrejta për mbikëqyrjen e operatorëve kryesorë të tregjeve, të cilët aktualisht mbikëqyren nga autoritetet kombëtare.
Megjithëse disa rregulla janë harmonizuar në të gjithë BE-në, dallimet në zbatimin e tyre, mbikëqyrjen dhe masat për respektimin e legjislacionit kanë kontribuar në fragmentimin e tregjeve financiare.
Presidenca irlandeze e BE-së deklaroi se paketa synon të lehtësojë qarkullimin ndërkufitar të kursimeve dhe investimeve, duke u mundësuar kompanive akses më të mirë në financim dhe duke u ofruar familjeve më shumë mundësi për të siguruar kthime nga kursimet e tyre.
Paketa parashikon që ESMA të marrë në mbikëqyrje të drejtpërdrejtë platformat kryesore të tregtimit, institucionet e klerimit dhe subjektet përgjegjëse për shlyerjen e transaksioneve me letra me vlerë, si dhe ofruesit e shërbimeve të kriptoaseteve.
Gjithashtu, parashikohet krijimi i një bordi ekzekutiv të pavarur, me anëtarë që do ta ushtrojnë funksionin me kohë të plotë, brenda këtij autoriteti.
Operatorët e tregjeve do të mund të zgjedhin vullnetarisht përfshirjen në një kuadër të ri rregullator për ushtrimin e aktivitetit në të gjithë BE-në.
Reformat synojnë gjithashtu të rrisin qëndrueshmërinë dhe njëtrajtshmërinë e mbikëqyrjes kombëtare, si dhe të përditësojnë rregullat për tregtimin, përfundimin e transaksioneve, administrimin e investimeve dhe përdorimin e teknologjisë blockchain.
Megjithatë, disa platforma tregtimi të administruara nga Deutsche Börse, kompania që operon Bursën e Frankfurtit, mund të mbeten jashtë mbikëqyrjes së drejtpërdrejtë të ESMA-s.
Gjermania kishte siguruar një përjashtim për platformat e Deutsche Börse që përqendrohen në tregun e brendshëm, duke lënë një pjesë të rëndësishme të sistemit nën mbikëqyrjen e autoriteteve rajonale gjermane. Njoftimi i fundit nuk dha hollësi për këtë çështje.
Ministri holandez i Financave, Eelco Heinen, e përshëndeti marrëveshjen.
“Sot u hodh një hap i madh përpara në zhvillimin e Unionit të Tregjeve të Kapitalit. Kemi bërë më shumë përparim në 10 muaj sesa në 10 vjet”, deklaroi ai.
Marrëveshja shënon një etapë të rëndësishme në krijimin e Unionit të Kursimeve dhe Investimeve (Savings and Investments Union – SIU), një nismë që synon të kanalizojë një pjesë më të madhe të kursimeve të qytetarëve evropianë drejt investimeve që mbështesin ekonominë.
Mbështetësit e integrimit më të thellë të tregjeve të kapitalit argumentojnë se një sistem më i unifikuar do të ulte kostot dhe do të përmirësonte aksesin e kompanive në financim, ndërsa kursimtarëve dhe investitorëve do t’u ofronte më shumë alternativa investimi./Përshtati nga Euronews, ekofin.al
