Marta Kos paralajmëron se Mali i Zi mund ta nënshkruajë traktatin e anëtarësimit në Bashkimin Europian gjatë verës së vitit të ardhshëm.
Komisionerja e zgjerimit pohoi se pjesa teknike e negociatave me Podgoricën mund të përfundojë deri në fund të këtij viti ose në fillim të vitit të ardhshëm, ndërsa thotë se KE-ja tashmë ka nisur përgatitjet për traktatin, që mund të firmoset vitin që vjen.
“Pas kësaj, vijon procesi i ratifikimit, i cili mund të zgjasë nga një deri në dy vjet, në varësi të asaj çfarë ndodh në vendet anëtare. Kjo do të thotë se Mali i Zi mund të bëhet anëtari i 28-të i BE-së në vitin 2028”, u shpreh Kos.
Mali i Zi konsiderohet vendi kandidat më i avancuar në procesin e anëtarësimit në BE. Deri më tani, Podgorica ka mbyllur përkohësisht 18 nga 33 kapitujt e negociatave. Autoritetet malazeze synojnë që negociatat për anëtarësim t’i përfundojnë deri në fund të këtij viti.
Mali i Zi pritet të jetë vendi i parë që do të përfshihet në zbatimin e rregullave të reja të Komisionit Evropian për vendet kandidate. Më 6 tetor, Komisioni miratoi propozimin për qasjen e re ndaj vendeve që synojnë anëtarësimin në BE.
Komisioni Europian ka bërë të ditur se kjo qasje fillimisht do të zbatohet për marrëveshjen e anëtarësimit me Malin e Zi dhe më pas edhe për traktatet e ardhshme të anëtarësimit. Zgjerimi i bllokut europian pritet të jetë një nga temat kryesore të samitit të liderëve europianë, që do të mbahet më 15 dhe 16 tetor në Bruksel.
