Pas një historie me praktika të diskutueshme tregtare, gjiganti i kriptovalutave Binance po bashkëpunon me BBVA-në e Spanjës për t’u mundësuar tregtarëve të ruajnë asetet e tyre te banka — një ndryshim i madh për botën e aseteve dixhitale.
Sipas raportimit të Financial Times, Binance po bashkëpunon me Banco Bilbao Vizcaya Argentaria (BBVA) për t’i lejuar klientët e kriptove të depozitojnë fondet e tyre në bankë, në vend që t’i mbajnë drejtpërdrejt në platformën e shkëmbimit të kriptovalutave.
Ky veprim synon të rikthejë besimin e investitorëve pas një gjobe rekord që Binance mori nga rregullatorët amerikanë pothuajse dy vite më parë.
Binance është shkëmbimi më i madh në botë për nga volumi i tregtimit dhe përpunon miliarda dollarë tregti çdo ditë për qindra kriptovaluta.
Çfarë do të thotë kjo për botën e kriptove?
BBVA, si bankë, do të veprojë si një “kujdestar i pavarur”, pra një palë e tretë e besueshme dhe e ndarë, duke garantuar një nivel më të lartë sigurie për fondet apo asetet e klientëve që tregtohen përmes Binance.
Si banka e dytë më e madhe në Spanjë, e vlerësuar për inovacion dhe qëndrueshmëri, BBVA do të shërbejë si një garanci sigurie, duke ulur rrezikun për tregtarët dhe duke i inkurajuar ata të investojnë në platformën e kriptovalutave që ofron kthime të larta. Duke i ruajtur fondet në BBVA, në rast se Binance përballet me probleme — si sulme kibernetike, falimentim apo masa rregullatore — fondet do të mbeten të sigurta në BBVA.
Bankat janë shumë më të rregulluara sesa shkëmbimet e kriptove, kështu që detyrimi i BBVA-së për të respektuar rregulloret e përputhshmërisë pritet të sjellë më shumë interes për botën e kriptove në përgjithësi.
Në thelb, ky veprim është i ngjashëm me vendosjen e sendeve me vlerë në një kasafortë apo bankë të sigurt, në vend që të ekspozohen në një dyqan gjatë blerjes dhe shitjes.
Binance përpiqet të pastrojë reputacionin
Binance, shkëmbimi më i madh i kriptovalutave në botë, u godit në vitin 2023 me një gjobë rekord prej 4.3 miliardë dollarësh (3.69 miliardë euro) pasi rregullatorët amerikanë e akuzuan se nuk kishte mbikëqyrur tregun e saj.
Zyrtarët amerikanë thanë se Binance kishte lejuar qarkullimin e fondeve të dyshimta përmes platformës dhe kishte lejuar përdorimin e parave të pastruara, duke ndihmuar klientët e mëdhenj të shmangnin rregullat.
Themeluesi Changpeng ‘CZ’ Zhao dha dorëheqjen dhe kreu një dënim me katër muaj burg për dështimin për të ndalur pastrimin e parave.
Tani, me rregullatorët që e ndjekin në çdo hap, Binance po përpiqet të pastrojë imazhin e saj dhe, përmes bashkëpunimit me BBVA-në e Spanjës, shpreson të tregojë se mund të ndjekë rregullat./Përshtati nga Euronews, ekofin.al
