Tregu i komunikimeve elektronike në Shqipëri po mbështetet gjithnjë e më shumë te interneti në celular dhe paketat me të dhëna, ndërsa të ardhurat nga telefonia tradicionale dhe rrjetet fikse po humbasin terren. Të dhënat e raportit vjetor 2025 të AKEP tregojnë një ndryshim të fortë në mënyrën se si shqiptarët komunikojnë, konsumojnë internet dhe përdorin shërbimet telefonike.
Sipas raportit, të ardhurat totale nga komunikimet elektronike arritën në rreth 40.15 miliardë lekë gjatë vitit 2025, ose rreth 418 milionë euro. Pjesa më e madhe e tyre, rreth 28.95 miliardë lekë, erdhi nga tregu celular, ndërsa rrjetet fikse gjeneruan rreth 11.2 miliardë lekë. Krahasuar me vitin 2024, të ardhurat nga shërbimet celulare u rritën me rreth 4%, ndërsa ato nga rrjetet fikse ranë lehtë nga 11.6 miliardë lekë në 11.2 miliardë lekë.
AKEP vlerëson se kjo lëvizje lidhet me rritjen e përdorimit të internetit mobil, paketave me të dhëna dhe zhvendosjen graduale të konsumatorëve drejt platformave alternative të komunikimit online. Në praktikë, qytetarët po përdorin më pak telefonatat tradicionale dhe më shumë internetin në celular për komunikim, rrjete sociale, video dhe shërbime digjitale.
Raporti tregon se tregu celular në Shqipëri mbetet i përqendruar te dy operatorët kryesorë, Vodafone Albania dhe One Albania, të cilët kontrollojnë pothuajse të gjithë tregun. Vodafone Albania mban rreth 58% të të ardhurave totale nga tregu celular, ndërsa One Albania zotëron rreth 42%.
Edhe struktura e tregut po ndryshon ndjeshëm. Shërbimet me pakicë dominojnë tregun celular me rreth 83% të të ardhurave totale, ndërsa shërbimet me shumicë përbëjnë vetëm 17%. Brenda tregut me pakicë, pakot e integruara “bundle”, që përfshijnë internet dhe shërbime komunikimi, gjenerojnë mbi 90% të të ardhurave.
Sipas AKEP, kjo tregon se përdoruesit shqiptarë po orientohen gjithnjë e më shumë drejt internetit si shërbimi bazë, ndërsa telefonatat dhe SMS-të tradicionale po zënë një peshë gjithnjë e më të vogël. Raporti evidenton gjithashtu një dominim të qëndrueshëm të segmentit postpaid, i cili përbën rreth 62% të të ardhurave me pakicë, kundrejt 38% të segmentit prepaid.
Ndërkohë, pesha e shërbimeve roaming, vijon të mbetet e rëndësishme për operatorët. Sipas raportit, rritja e përdorimit të internetit gjatë udhëtimeve jashtë vendit dhe hyrja e turistëve në Shqipëri kanë shtuar të ardhurat nga shërbimet roaming, si për paketat me pakicë ashtu edhe për ato me shumicë.
Ndërkohë, tregu i rrjeteve fikse po përballet me presion të vazhdueshëm konkurrues. Të ardhurat nga ky segment ranë në rreth 11.2 miliardë lekë gjatë vitit 2025, ndërsa përdoruesit po migrojnë gradualisht drejt shërbimeve mobile dhe platformave OTT, si aplikacionet e komunikimit online.
Megjithatë, tregu fiks mbetet i përqendruar te operatorët kryesorë dhe të mesëm, të cilët gjenerojnë rreth 76% të të ardhurave të këtij segmenti. One Albania dhe Vodafone Albania kanë pjesën kryesore edhe në rrjetin fiks, respektivisht me 26% dhe 24% të të ardhurave, ndërsa operatorët e tjerë kryesorë luhaten në intervalin 3–8%. /ekofin.al
Artikull i Ekofin.al
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke
cituar “Ekofin.al”, shoqëruar me linkun e artikullit origjinal.
