Kryeministri Edi Rama ftoi sot mbi 1000 mijë pjesëmarrës nga 37 shtete që ndodhen në Tiranë në kuadër të aktivitetit ““Match-Maker Albania 2025”, të investojnë në Shqipëri.
Në fjalën e tij në këtë aktivitet, ku marrin pjesë investitorë, agjenci të zhvillimit dhe eksportues shqiptarë për investimet në turizëm, pasuri të paluajtshme dhe infrastrukturë, si dhe fuqizimi i markës “Made in Albania”, Rama tha se “nuk dua të mbaj një fjalë të gjatë, jam i sigurt që keni ardhur tashmë këtu, ndaj nuk keni nevojë të bindeni për të ardhur, por dua të them thjesht për këdo që ka ardhur të hedhë një sy këtu duhet të kuptojë që kjo është koha për të investuar në Shqipëri”.
“Është koha për të blerë qoftë edhe një gur në Shqipëri sepse nesër do të jetë vonë, nesër të gjithë do të duan të vijnë, do të duan të blejnë dhe të do të jetë shumë e shtrenjtë për shumicën prej jush. Kështu që çfarëdo doni të blini, blijeni tani çfarë doni të bëni bëjeni tani. Sado të doni që të bëni në fitime bëjeni tani sepse është koha që kur Shqipëria nis të lulëzojë dhe ende nuk është plotësisht e njohur për potencialin që ka dhe për mundësitë e jashtëzakonshme”, theksoi Rama.
Kryeministri u shpreh se investimi sot në malet e Shqipërisë, është një investim që do të kthehet shumëfish në të ardhmen.
Rama u shpreh se “ka diçka që vazhdon të jetë shumë, shumë e lirë në Shqipëri që është gjithçka që dikush mund të kërkojë në male. Por për të gjithë ata që e njohin Shqipërinë përmes detit, apo përmes qyteteve të saj dhe mendon që ka parë më të mirën, po ju them që më e mira është në male dhe çfarëdo që dikush do të bëjë sot në male është diçka që do t’i shpërblehet në një mënyrë të shumëfishtë dhe me shifra të shumëfishta në një të ardhme jo të largët, por të afërt”.
“Match-Maker Albania 2025”, eventi më i madh i vitit për biznesin, i organizuar nga Agjencia Shqiptare e Zhvillimit të Investimeve nisi sot në Tiranë, me mbi 1000 pjesëmarrës nga 37 shtete, përfshirë investitorë, agjenci zhvillimi dhe eksportues shqiptarë për investimet në turizëm, pasuri të paluajtshme dhe infrastrukturë, si dhe fuqizimi i markës “Made in Albania”.
Kjo platformë e krijuar për të nxitur partneritete dhe bashkëpunim, është një mundësi e jashtëzakonshme për të lidhur eksportuesit shqiptarë me tregjet ndërkombëtare, për të prezantuar investimet vendase dhe të huaja në Shqipëri, për të shfaqur potencialin e vendit dhe për të krijuar bashkëpunime të reja me kompani botërore.
