Testimet e trenave Frecciarossa në Gjermani dhe Austri po i hapin rrugë lidhjeve hekurudhore me shpejtësi të lartë mes Romës, Milanos dhe Mynihut. Shërbimet e para pritet të nisin në verën e vitit 2027.
Nga Roma në Mynih me një tren Frecciarossa, përmes Innsbruck-ut. Ferrovie dello Stato (FS) ka nisur testimet e trenave Frecciarossa të operuar nga Trenitalia në Gjermani dhe Austri, në kuadër të fazës së certifikimit ndërkombëtar.
Grupi FS ka njoftuar se nisja e shërbimeve Milano–Mynih dhe Romë–Mynih është planifikuar për verën e vitit 2027, “pas përfundimit me sukses të procesit të miratimit të trenave të rinj”.
Pas Francës dhe Spanjës, si dhe me objektivin për të arritur në Mbretërinë e Bashkuar përmes Tunelit të La Manshit deri në vitin 2029, hekurudhat shtetërore italiane po shtrihen tashmë edhe në zemër të Evropës.
Nisma po realizohet në partneritet me kompanitë kombëtare hekurudhore të Gjermanisë dhe Austrisë, Deutsche Bahn dhe ÖBB.
Hapja e Tunelit Bazë të Brennerit pritet të shkurtojë kohën e udhëtimit me rreth një orë dhe, nga dhjetori i vitit 2028, shërbimi i plotë do të përfshijë dhjetë lidhje mes Italisë dhe Gjermanisë, në linjat Milano, Romë dhe Mynih, të cilat më vonë do të zgjerohen edhe drejt Napolit dhe Berlinit.
Ku do të ndalojnë shërbimet e reja?
Oferta tregtare parashikon katër lidhje në itineraret Milano–Mynih dhe Romë–Mynih.
Në linjën Milano–Mynih, me një kohë udhëtimi prej rreth gjashtë orësh e gjysmë, ndalesat kryesore ndërmjetëse do të jenë Brescia, Verona, Rovereto, Trento, Bolzano dhe Innsbruck.
Në linjën Romë–Mynih, ku udhëtimi do të zgjasë rreth tetë orë e gjysmë, ndalesat kryesore do të jenë Firence, Bologna, Verona, Rovereto, Trento, Bolzano dhe Innsbruck.
Drejt rrjetit të ri “Metroja Evropiane”
“Nisja e testimeve në Gjermani dhe Austri është një hap drejt realizimit të një projekti që konfirmon ambicien tonë për ta bërë trenin mjetin referues të transportit për lëvizshmërinë në të gjithë Evropën”, deklaroi drejtori ekzekutiv dhe menaxheri i përgjithshëm i FS, Gianpiero Strisciuglio.
“Falë partneritetit tonë me Deutsche Bahn dhe ÖBB, po ecim drejt krijimit të ‘Metrosë Evropiane’ të shpejtësisë së lartë, duke u ofruar pasagjerëve një shërbim të aftë për të afruar rajonet, njerëzit dhe ekonomitë”, shpjegoi Strisciuglio.
Kreu i FS shtoi se Frecciarossa “po vijon kështu rrugën e zgjerimit ndërkombëtar, duke çuar jashtë vendit ekselencën teknologjike dhe industriale të Grupit FS dhe duke kontribuar në zhvillimin e një rrjeti hekurudhor evropian gjithnjë e më të integruar”.
Edhe ministri italian i Infrastrukturës dhe Transportit, Matteo Salvini, ka shprehur kënaqësi për këtë etapë.
Salvini e cilësoi atë si “një hap të mëtejshëm që konfirmon rritjen e Grupit FS dhe aftësinë e tij për të fituar tregje të reja jashtë vendit, ndërkohë që ofron shërbime dhe infrastrukturë më të mirë në Itali. Më shumë vende pune, më shumë lidhje, më shumë Itali në Evropë”.
Marrëveshja mes Trenitalia-s dhe Deutsche Bahn do të mundësojë gjithashtu shkëmbimin e ekspertizës teknike, në mënyrë që trenat të përshtaten me sistemet e ndryshme të furnizimit me energji elektrike dhe sinjalizimit. Kjo pritet të përshpejtojë procesin teknik të nevojshëm dhe të mbajë nën kontroll kostot përkatëse.
Paralelisht me ndërtimin e prototipeve, kanë nisur edhe programet e trajnimit për personelin drejtues të trenave në Gjermani dhe Austri.
Frecciarossa, i projektuar në përputhje me specifikimet teknike evropiane për interoperabilitetin, është ndërtuar për të operuar në Itali dhe në rrjetet hekurudhore të Francës, Gjermanisë, Spanjës, Austrisë, Zvicrës, Holandës dhe Belgjikës.
Lidhja e re do të ndikojë gjithashtu në udhëtimet hekurudhore drejt vendeve të tjera, duke synuar të tërheqë kërkesën për destinacione si Frankfurti dhe Krakovi./Përshtati nga Euronews, ekofin.al
