Zëvendësguvernatorja e Dytë e Bankës së Shqipërisë, Natasha Ahmetaj, ka vënë theksin te roli gjithnjë e më strategjik i diasporës shqiptare në zhvillimin ekonomik dhe në procesin e integrimit evropian të vendit, gjatë pjesëmarrjes së saj në Samitin e Diasporës Shqiptare.
Në panelin “Diaspora shqiptare si partner mbështetës për integrimin evropian dhe zhvillimin e qëndrueshëm”, Ahmetaj e cilësoi diasporën si një burim të dyfishtë vlere për ekonominë: kapital njerëzor dhe financiar. Sipas saj, remitancat vijojnë të jenë një ndër shtyllat kryesore të mbështetjes për ekonominë shqiptare, duke kontribuar jo vetëm në të ardhurat e familjeve, por edhe në stabilitetin makroekonomik dhe në rritjen e konsumit.
Në këtë kuadër, Banka e Shqipërisë ka intensifikuar përpjekjet për formalizimin dhe rritjen e efikasitetit të kanaleve të dërgimit të remitancave. Qëllimi është ulja e kostove të transfertave dhe zgjerimi i aksesit të qytetarëve në shërbimet financiare, duke i kthyer këto flukse në një instrument më të fuqishëm për zhvillim afatgjatë dhe për reduktimin e varfërisë.
Një tjetër fokus i rëndësishëm i politikave të Bankës së Shqipërisë lidhet me modernizimin e sistemit të pagesave. Ahmetaj theksoi hartimin e strategjisë për pagesat me vlerë të vogël, përmirësimin e kuadrit ligjor për shërbimet e pagesave dhe nxitjen e sektorit fintech, si elementë kyç për rritjen e përfshirjes financiare, sidomos në zonat më pak të mbuluara nga sistemi bankar.
Në këtë drejtim, një zhvillim i rëndësishëm është edhe anëtarësimi i Shqipërisë në zonën SEPA, i cili pritet të ulë ndjeshëm kostot e pagesave ndërkufitare dhe të rrisë shpejtësinë dhe sigurinë e transfertave, duke afruar më tej sistemin financiar shqiptar me atë evropian.
Ahmetaj nënvizoi gjithashtu se potenciali i diasporës nuk kufizohet vetëm te remitancat, por shtrihet edhe në transferimin e njohurive, përvojës dhe praktikave më të mira ndërkombëtare. Sipas saj, ky kapital i padukshëm është thelbësor për rritjen e konkurrueshmërisë së ekonomisë shqiptare dhe për integrimin në zinxhirët globalë të prodhimit.
Në përfundim, ajo theksoi se sistemi financiar shqiptar është i pozicionuar për të mbështetur iniciativa inovative dhe projekte zhvillimi, duke kërkuar një bashkëpunim më të strukturuar me diasporën, me qëllim shfrytëzimin maksimal të potencialit të përbashkët për një rritje të qëndrueshme dhe gjithëpërfshirëse.
