Gati gjysma e evropianëve nuk mund ose nuk duan të blejnë një shtëpi, sipas raportit RE/MAX European Housing Trend Report 2025. Në 23 vende të analizuara, 44% e atyre që nuk kanë banesë në pronësi thonë se nuk do të blejnë kurrë ose nuk janë të interesuar ta bëjnë këtë, duke reflektuar kryesisht problemet e përballueshmërisë.
Mesatarisht, 29% e të anketuarve deklaruan se nuk mendojnë se do të jenë ndonjëherë në gjendje të blejnë një pronë. Kjo përqindje varion nga 13% në Turqi në 44% në Çeki. Shifra të larta u regjistruan edhe në Slloveni me 39%, Itali me 35%, Maltë me 34% dhe Irlandë, Poloni e Hungari me nga 33%. Në pesë ekonomitë më të mëdha europiane, Italia kishte nivelin më të lartë me 35%, ndërsa Spanja dhe Franca më të ulëtin me 25%, Mbretëria e Bashkuar ishte në 26% dhe Gjermania në 28%.
Nga ana tjetër, 15% e të anketuarve thanë se nuk janë të interesuar të blejnë një pronë, me diferenca të mëdha mes vendeve, nga 4% në Irlandë në 31% në Gjermani. Në Holandë kjo shifër ishte 27%, në Austri 25% dhe në Zvicër 22%, ndërsa në Turqi ishte vetëm 5%.
Kur kombinohen të dy grupet, përqindja e atyre që nuk mund ose nuk duan të blejnë një shtëpi arrin në 44% në nivel europian dhe kalon gjysmën në Gjermani me 59%, Austri dhe Çeki me nga 54%, Holandë me 53% dhe Zvicër me 52%. Italia dhe Malta ishin në 49%, Finlanda dhe Sllovenia në 48%, ndërsa Polonia dhe Mbretëria e Bashkuar në nivelin mesatar prej 44%. Turqia kishte nivelin më të ulët me vetëm 18%, ndërsa Spanja ishte në 32% dhe Franca në 40%.
Arsyet ndryshojnë, por 53% e atyre që nuk duan të blejnë thonë se janë të kënaqur me situatën aktuale, 21% nuk duan përgjegjësitë e pronësisë, 19% e konsiderojnë pronën shumë të shtrenjtë, 16% preferojnë fleksibilitetin dhe 13% thonë se mund të përballojnë vetëm qiranë në zonat ku jetojnë. Vetëm 5% shprehen të shqetësuar për rënien e çmimeve.
Sipas Eurostat, rreth 70% e banorëve të Bashkimit Europian zotërojnë banesën e tyre, ndërsa 30% jetojnë me qira.
| Arsyeja | % |
| Jam i kënaqur me situatën aktuale dhe nuk shoh nevojë për ndryshim | 53 |
| Nuk dua përgjegjësitë e vazhdueshme të pronësisë së një prone | 21 |
| Nuk ia vlen për paratë / prona është e mbivlerësuar | 19 |
| Preferoj fleksibilitetin për të lëvizur lehtë / nuk dua të jem i lidhur me një vend | 16 |
| Mund të përballoj të jetoj me qira në zona ku nuk mund të blej pronë | 13 |
| Arsye tjetër | 10 |
| Dua të jem në gjendje të ndryshoj lehtë madhësinë ose llojin e banesës sipas nevojave | 10 |
| Jam i shqetësuar për rënien e çmimeve të pronave | 5 |
