Vlera e projektuesit kryesor të çipave, Nvidia, arriti përkohësisht një rekord të ri, duke e bërë për pak kohë kompaninë më të vlefshme në histori, me një kapitalizim tregu që iu afrua 4 trilionë dollarëve. Analistët parashikojnë se së shpejti do ta thyejë sërish këtë rekord.
Aksionet e prodhuesit të çipave për inteligjencën artificiale (AI) Nvidia arritën një nivel historik të ri, duke i dhënë përkohësisht kompanisë një kapitalizim tregu prej 3.92 trilionë dollarësh (3.33 trilionë euro) – më i larti ndonjëherë për çdo kompani.
Kjo shifër tejkaloi rekordin e mëparshëm të Apple prej 3.91 trilionë dollarësh, vendosur në dhjetor 2024, edhe pse kapitalizimi i tregut të Nvidia-s ra sërish nën këtë nivel deri në fund të ditës së tregtimit.
Aksionet e Nvidia-s u tregtuan deri në 160.98 dollarë për aksion, përpara se çmimi të binte pak, duke e vendosur kapitalizimin e tregut në rreth 3.89 trilionë dollarë në mbyllje të tregut.
Aksionet e kompanive teknologjike përfituan nga një raport pozitiv për punësimin jo-bujqësor në SHBA, që tregoi forcën e ekonomisë amerikane. Optimizmi u shtua nga pritshmëritë se bizneset do të vazhdojnë të investojnë në zhvillimin e AI-së, duke rritur kërkesën për çipa të specializuar.
Aksionet e Nvidia-s janë rritur me mbi 50% brenda më pak se dy muajve. Analistët presin që kompania së shpejti të thyejë përfundimisht rekordin e vlerës dhe të ruajë këtë çmim të lartë aksionesh deri në mbylljen ditore të tregut.
“Gjiganti i çipave Nvidia është në rrugë për të shënuar një rekord të ri në mbyllje tregu,” tha Dan Coatsworth, analist investimesh në AJ Bell, duke shtuar se “revolucioni i AI-së vazhdon të jetë i fuqishëm”.
Kreu i analizës financiare në AJ Bell, Danni Hewson, shtoi: “Pas të gjitha parashikimeve pesimiste se ky mund të jetë viti kur flluska e AI-së do të shpërthejë, Nvidia ka gjetur një marsh të ri. Prodhuesi i çipave është në prag të thyerjes së një rekordi të lakmuar, duke u bërë kompania më e vlefshme ndonjëherë në botë.”
Vlera aktuale e Nvidia është më shumë se trefishi i kapitalizimit total të bursës në Spanjë dhe më shumë se katër herë më e lartë se ajo e bursës italiane./Përshtati nga Euronews, ekofin.al
