Punimet për ndërtimin e aksit të ri rrugor Janinë–Kakavijë kanë nisur zyrtarisht, duke shënuar startin e një prej projekteve më të rëndësishme infrastrukturore ndërkufitare në rajon, me ndikim të drejtpërdrejtë në lëvizjen tregtare, turizmin dhe integrimin ekonomik mes Greqisë, Shqipërisë dhe vendeve të Ballkanit Perëndimor.
Në terren kanë nisur punimet përgatitore, që përfshijnë pastrimin e zonës nga bimësia, ndërhyrjet e para me mjete të rënda dhe nivelimin e terrenit, duke materializuar konkretisht një projekt të shumëpritur për rajonin e Epirit dhe për lidhjen me kufirin shqiptar.
Kontrata për realizimin e projektit, me një vlerë prej 310 milionë eurosh, është firmosur në dhjetor 2024. Sipas Sekretarit të Përgjithshëm për Infrastrukturën në Greqi, Dimitris Anagnopoulos, aksi pritet të përfundojë brenda katër viteve, duke e vendosur përfundimin e tij në horizontin 2028.
Aksi Janinë–Kakavijë do të ketë një gjatësi totale prej 70 kilometrash dhe do të shërbejë si vazhdim i Autostradës Joniane, duke lidhur qytetin e Janinës me pikën kufitare të Kakavijës. Ky segment konsiderohet boshti më perëndimor vertikal i Autostradës Egnatia dhe pjesë e rrjetit kryesor evropian të transportit (TEN-T), çka i jep projektit një dimension strategjik për korridoret e lëvizjes në Evropën Juglindore.
Projekti ndahet në dy segmente kryesore. Segmenti Janinë–Kalpak, me gjatësi 46.4 kilometra, do të ndërtohet me trase të re dhe do të përfshijë gjashtë nyje pa kryqëzim në nivel, duke garantuar standarde të larta sigurie dhe rrjedhshmërie. Ndërsa segmenti Kalpak–Kakavijë, me gjatësi 23.1 kilometra, parashikon modernizimin e rrugës ekzistuese deri në kufi.
Autostrada është projektuar për shpejtësi 100 km/orë, me dy korsi për çdo drejtim dhe korsi emergjence. Gjerësia totale do të jetë 22.25 metra, e pajisur me ndarje qendrore dhe barriera sigurie, në përputhje me standardet bashkëkohore të infrastrukturës rrugore evropiane.
Me përfundimin e këtij aksi, koha e udhëtimit nga Athina deri në kufirin me Shqipërinë pritet të reduktohet në rreth 4 orë e 30 minuta, nga rreth 6 orë aktualisht, ndërsa në periudhat me trafik të shtuar, kur koha mund të arrijë deri në 8–9 orë, përfitimi do të jetë edhe më i ndjeshëm. Kjo pritet të ndikojë pozitivisht në flukset turistike, transportin e mallrave dhe qarkullimin e lirë të qytetarëve.
