Shoqëritë që operojnë në transportin qytetës, rrethqytetës dhe ndërqytetës do të përfitojnë mbështetje financiare nga buxheti i shtetit për përballimin e kostove të karburantit gjatë periudhës mars-maj 2026.
Sipas njoftimit zyrtar të Tatimeve, në zbatim të vendimit të Këshillit të Ministrave, subjektet e transportit publik do të kompensohen me 50 lekë për çdo litër karburant të konsumuar gjatë kësaj periudhe. Fondi i vënë në dispozicion për këtë masë arrin në 250 milionë lekë.
Masa synon të lehtësojë barrën financiare të operatorëve të transportit publik, të cilët gjatë muajve të fundit janë përballur me rritje të kostove operative, veçanërisht për karburantin, pas rritjes së çmimeve në tregjet botërore.
Sipas procedurës së përcaktuar, aplikimet për përfitimin e kompensimit financiar duhet të dorëzohen pranë Drejtorisë Rajonale Tatimore përkatëse. Kërkesat mund të paraqiten pas datës 10 të muajit pasardhës, ndërsa afati përfundimtar për pranimin e tyre është data 1 gusht 2026.
Përfitues të skemës janë shoqëritë e licencuara që ushtrojnë aktivitet në transportin publik qytetës, rrethqytetës dhe ndërqytetës dhe që plotësojnë kriteret e përcaktuara në vendimin e qeverisë.
Kjo është një nga masat mbështetëse të ndërmarra nga qeveria për sektorin e transportit publik, i cili konsiderohet një shërbim me rëndësi të veçantë për qytetarët dhe ekonominë. Autoritetet u bëjnë thirrje të gjitha subjekteve që plotësojnë kushtet të aplikojnë brenda afateve ligjore, në mënyrë që të përfitojnë kompensimin financiar të parashikuar. /ekofin.al
