Tregu i fondeve të investimeve vijon të njohë zgjerim, si në numër anëtarësh, ashtu edhe në vlerë asetesh. Sipas të dhënave të fundit, të publikuara nga Autoriteti i Mbikëqyrjes Financiare rezulton se në fund të muajit shtator, vlera neto e aseteve të fondeve, arriti rreth 75.15 miliardë lekë me një rritje prej 7,742 milionë lekë ose 11.49%, krahasuar me 31.12.2020.
Ky treg dominohet kryesisht nga investimet në Obligacione Qeveritare, të cilat përbëjnë 64.67% të aseteve të fondeve, me një rritje prej 5.59% krahasuar me 31.12.2020. Numri i anëtarëve që kanë investuar në Fondet e Investimit më 30.09.2021 është 38,015 me një rritje prej 16.41% krahasuar me 31.12.2020.
AMF informon gjithashtu se gjatë kësaj periudhe, në tregun e fondeve të investimeve ushtruan aktivitetin e tyre nëntë fonde investimi. Fondi i investimeve “Raiffeisen Prestigj”, “Raiffeisen Invest Euro”, “Raiffeisen Vizion” dhe “Raiffeisen Mix” të administruara nga shoqëria “Raiffeisen Invest”, fondi i investimeve “Credins Premium” nën administrimin e shoqërisë administruese “Credins Invest”, fondi “WVP Top Invest” dhe fondi “WVP GLOBAL” administrohet nga shoqëria “WVP Fund Management Tirana sh.a”, fondi i investimeve “Albsig Standard” nën administrimin e shoqërisë administruese “Albsig Invest”sh.a, fondi “ABI EIA” administrohet nga shoqëria “ABI Invest”.
Ligji i ri i miratuar vitin e kaluar ka sjellë më shumë mundësi diversifikimi, duke krijuar edhe mundësinë e fondeve alternative të investimit. Megjithatë,tregu vijon të jetë i kufizuar te investimet në Obligacione Qeveritare, të cilat edhe nga pikëpamja e rrezikut vleresohen me risk më të ulët. Megjithatë, fondeve si “WVP Top Invest” dhe fondi “WVP GLOBAL” pjesën më e madhe të investimeve e realizojnë në aksione të shoqërive të njohura jashtë vendit, aty ku për shkak të luhatshmërisë më të madhe, norma e investimit është më e madhe, por edhe risku disi më i lartë.
