Yieldi 12 mujor i bonove të thesarit të qeverisë shënoi një rënie të mëtejshme në ankandin më të fundit, zhvilluar më 25 mars. Sipas të dhënave të Bankës së Shqipërisë, yieldi mesatar i ponderuar zbriti në 2.7%, ndjeshëm poshtë normës bazë të interesit.
Në ankandin e mëparshëm të muajit mars kishte vijuar trendi rënës i interesave të yieldit, duke zbritur në 2.73%. Kjo është një nga shifrat më të ulëta të yieldeve, që nga viti 2022, kur nisi gradualisht edhe rritja e tyre. Megjithatë, duhet theksuar se përgjatë vitit 2024 dhe tani edhe në muajt e parë të këtij viti, përgjithsësisht normat kanë qëndruar të ulëta.
Në ankandin e fundit, shuma e shpallur ishte 12 miliardë lekë dhe oferta ka ardhur për më shumë, mbi 12.5 miliardë lekë. Pikërisht prania më e lartë e ofertës në lekë për blerjen e bonove të thesarit të Qeverisë ka ndikuar në uljen e mëtejshme të yieldit.
Pas rritjes në ankandet e muajit janar, interesat e bonove të thesarit 12-mujoreve iu kthyen tendencës rënëse në ankandet e shkurtit, për të vijuar me një rënie të mëtejshme edhe në ankandet e marsit.
Bono 12-mujore është instrumenti kryesor referencë sidomos për kreditë hipotekore dhe rënia e mëtejshme e yieldeve nënkupton rënie të interesave të kredive për shtëpi në lekë dhe nxitje të mëtejshme të kreditimit. /ekofin.al
