Yield-et e bonove 12-mujore e mbyllin vitin 2024, me një rënie të mëtejshme, ku në ankandin e fundit të këtyre instrumentave në Bankën e Shqipërisë, yieldi mesatar i ponderuar zbriti në 2.73%, për herë të parë edhe më poshtë se norma bazë e interesit.
Yieldet e bonove me maturim 12-mujor kanë patur tendencë rënëse përgjatë këtij viti, sidomos kur Banka e Shqipërisë ndryshoi kursin e politikës monetare, duke ulur normat e interesit, pas normalizimit të inflacionit. Tashmë, interesi i këtyre instrumentave investimi ka zbritur në nivelin më të ulët që nga qershori i vitit 2022, duke sjellë një ndikim direkt edhe në interesat e kredive të reja, por edhe rishikimin e atyre ekzistuese, sidomos ato hipotekore, që zakonisht janë të lidhura me këtë instrument.
Në ankandin e zhvilluar përpara Krishtlindjeve, kërkesa ishte sërish shumë më e lartë se oferta. Ministria e Financave kishte shpallur si shumë 6 miliardë Lekë, ndërkohë që nga institorët gadishmëria për investim arriti në 9.5 miliardë Lekë. Në fund, Ministria e uli disi shumën në 5.8 miliardë Lekë, gjë që solli edhe një ulje të mëtejshme të Yieldit.
Rënia e vazhdueshme e këtij instrumenti, sipas ekspertëve, shpjegohet edhe në gjendjen e likuiditetit në treg, kjo edhe për shkak se një sasi shumë e madhe parash nga buxheti, të pashpenzuara gjatë vitit, pritet të shpenzohen në muajin e fundit, tendencën rënëse të borxhit publik dhe uljen e presioneve ndaj tij, si edhe rënien e inflacionit dhe në përgjithësi të risqeve fiskale.
Normat e ulëta të interesit të kredive kanë shtyrë më tej kredidhënien përgjatë këtij viti. Edhe pse nuk janë ende të disponueshme shifrat e tre-mujorit të katërt dhe të fundit, tendencat diktojnë një vit rekord sa i përket kredidhënies, si për bizneset, ashtu edhe për individët. /ekofin.al
