Procesi i faljes së detyrimeve tatimore të papaguara vijon të japë rezultate, ndërsa Administrata Tatimore njofton se deri tani janë fshirë ose shuar automatikisht detyrime në vlerën e 215 milionë eurove për 25,005 tatimpagues, në zbatim të përcaktimeve të ligjit për faljen fiskale.
Sipas njoftimit të publikuar nga Tatimet në rrjetet sociale, bëhet fjalë për detyrime tatimore të papaguara që lidhen me periudhën deri më 31 dhjetor 2014, të cilat janë fshirë pa kushte për subjektet përfituese.
Administrata Tatimore rikujton gjithashtu se 30 qershori 2026 mbetet afati i fundit për një tjetër kategori përfituesish, konkretisht për tatimpaguesit që synojnë të përfitojnë nga fshirja e 50% të detyrimit principal. Për të përfituar nga kjo lehtësi, subjektet duhet të kryejnë pagesën e detyrimit të kërkuar brenda këtij afati.
Skema e faljes fiskale është një nga nismat më të mëdha të ndërmarra vitet e fundit për pastrimin e stokut të detyrimeve të vjetra tatimore dhe për lehtësimin e barrës financiare të bizneseve dhe individëve. Vetëm pak ditë më parë, Tatimet raportuan se mbi 105 mijë tatimpagues kishin përfituar nga fshirja e gjobave administrative, me një vlerë totale prej 91.6 milionë eurosh.
Administrata Tatimore u bën thirrje tatimpaguesve që të mos presin ditët e fundit për të kryer procedurat e nevojshme, ndërsa për çdo informacion shtesë ose sqarim ka vënë në dispozicion adresën elektronike [email protected]./ekofin.al
