Agjencia Shqiptare e Zhvillimit të Investimeve (AIDA) ka realizuar një video promovuese të Shqipërisë, e cila së fundmi, me rritjen e turizmit, ka njohur rritje domethënëse edhe të investimeve të huaja direkte. Materiali është publikuar në rrjetet sociale nga Kryeministri Edi Rama, me përshkrimin: “Videokartolinë e bukur promovimi të mundësive të Shqipërisë nga Agjencia Shqiptare e Investimeve dhe Zhvillimit (AIDA)”.
“Një tokë ku e ardhmja ndërtohet jo vetëm mbi numra dhe statistika, por mbi ëndrra dhe aspirata. Një vend që nuk ekziston thjesht në hartë, por që frymon me mundësi të pakufizuara. Përfytyrojeni veten këtu duke u zgjuar në një vend të pasur me thesaret e natyrës, ku lumenjtë rrjedhin përmes luginave të bukura dhe dielli mbulon me flakë ari fushat bujqësore që shtrihen pafund. Burimet natyrore të Shqipërisë janë të pasura dhe gati për të ushqyer ëndrrat dhe vizionet tuaja. Minerale, energji dhe toka pjellore, që presin të mbjellin suksesin tuaj”, thuhet në videon e AIDA-s.
Duke ftuar investitorët të investojnë në Shqipëri, AIDA thekson në videon e publikuar se “këtu, rritja është e mirëpritur dhe zhvillimi, është një mundësi e përqafuar. Ekonomia është në zhvillim, tregjet po zgjerohen dhe zemra e vendit pulson me ambicie”.
“Shqipëria është në kryqëzimin ku kulturat dhe tregjet takohen. Nga këtu ju lidheni me Evropën, Lindjen e Mesme dhe më gjerë. Shqipëria është një vend me shpirt me një histori dhe energji që nuk resht kurrë. Portet që hapen në Adriatik dhe Mesdhe. Portat që drejtojnë biznesin tuaj në zemrën e kontinenteve, Shqipëria nuk është thjesht një vend është një ritëm një puls që ndjek rrjedhën e tregtisë globale”, thuhet në video.
Referuar shifrave më të fundit të publikuara nga Banka e Shqipërisë, investimet e huaja direkte po ruajnë një ritëm të lartë përgjatë këtij viti, duke projektuar tejkalimin për herë të parë të kufirit prej 1.5 miliardë Eurosh.
Në total, për 9 muajt e parë të këtij viti, investimet e huaja direkte arritën në 1.16 miliardë Euro, ose rreth 6.6% më shumë sesa e njëjta periudhë e vitit të kaluar.
