Administrata Tatimore ka vënë në dispozicion të individëve shërbimin elektronik “Tax Test”, një instrument i thjeshtë online që u mundëson qytetarëve të verifikojnë në kohë reale nëse kanë detyrim për të dorëzuar Deklaratën Individuale Vjetore të të Ardhurave (DIVA) 2025.
Shërbimi është i aksesueshëm në faqen zyrtare të Tatimeve, në linkun:
https://www.tatime.gov.al/c/3/10/652/deklarata-individuale-vjetore-e-te-ardhurave
“Tax Test” funksionon si një pyetësor i strukturuar, i cili – bazuar në përgjigjet e dhëna – informon menjëherë individin nëse plotëson kriteret ligjore për të qenë subjekt deklarimi për vitin 2025. Platforma është ndërtuar në mënyrë të tillë që nuk kërkon emër përdoruesi apo fjalëkalim dhe nuk përfshin të dhëna konfidenciale, duke garantuar përdorim të lehtë dhe të sigurt si për rezidentët ashtu edhe për jorezidentët.
Sipas Administratës Tatimore, afati i deklarimit dhe pagesës së DIVA 2025, në bazë të ligjit të ri për tatimin mbi të ardhurat, është 31 mars 2026.
Subjekt deklarimi për vitin 2025 janë individët që:
• Kanë realizuar të ardhura bruto 1.200.000 lekë ose më shumë nga të gjitha burimet, jo vetëm nga paga;
• Kanë qenë në më shumë se një marrëdhënie punësimi gjatë të paktën një muaji;
• Kanë realizuar gjatë vitit 2025 të ardhura mbi 50.000 lekë, për të cilat nuk është mbajtur tatim në burim (p.sh. qiradhënie nga individë të paregjistruar, qira ditore, të ardhura nga platforma si Booking apo Airbnb etj.).
Administrata Tatimore u bën thirrje qytetarëve të mos presin afatin e fundit, por të përdorin paraprakisht “Tax Test” për të shmangur paqartësitë dhe për të respektuar detyrimin ligjor brenda afatit.
Një element i rëndësishëm që shpesh anashkalohet është se edhe individët që nuk kanë detyrim ligjor për deklarim, por plotësojnë kushtet për të përfituar rimbursim për fëmijët në ngarkim apo për shpenzime arsimore, duhet të dorëzojnë DIVA 2025 për të përfituar nga këto zbritje tatimore.
Në këtë kuadër, “Tax Test” shërben jo vetëm si një filtër paraprak ligjor, por edhe si një mjet orientues për planifikimin fiskal individual, duke reduktuar riskun e gabimeve dhe penaliteteve.
Afati 31 mars 2026 mbetet data kyçe për çdo individ që rezulton subjekt deklarimi për vitin fiskal 2025. /ekofin.al
