Bordi i Transparencës ka vendosur një tjetër ulje të ndjeshme të çmimeve të karburanteve në vend, duke reflektuar rënien e fundit në tregjet ndërkombëtare dhe efektin zinxhir në tregun vendas.
Në mbledhjen e datës 18 prill 2026, u vendos që çmimi tavan i naftës (gazoil) për shitje me pakicë të ulet në 197 lekë/litër, nga nivele më të larta në ditët e mëparshme, ndërsa për shitjen me shumicë në 185 lekë/litër. Edhe benzina shënoi rënie, me çmimin tavan në pakicë që fiksohet në 172 lekë/litër dhe në shumicë 160 lekë/litër.
Kjo lëvizje konfirmon një trend zbritës në vetëm pak ditë, ku nga nivelet mbi 210 lekë/litër për naftën në fillim të muajit, çmimet tashmë janë rikthyer nën pragun psikologjik të 200 lekëve.
Vendimi hyn në fuqi menjëherë, nga ora 10:30 e datës 18 prill, dhe do të mbetet në fuqi deri në një vendim të ri të Bordit, ndërkohë që autoritetet paralajmërojnë masa të forta ndaj çdo subjekti që nuk zbaton çmimet e përcaktuara.
Një element i rëndësishëm lidhet edhe me politikën fiskale: duke qenë se çmimet aktuale janë nën pragjet e përcaktuara në aktin normativ të 3 prillit (220 lekë/litër për naftën dhe 200 lekë/litër për benzinën), nuk aktivizohet ulja e akcizës. Kjo do të thotë se taksa e akcizës vijon të zbatohet në nivel të plotë, 100%.
Në këtë kontekst, rënia e çmimeve vjen e gjitha nga dinamika e tregut dhe jo nga ndërhyrje fiskale, duke sjellë një lehtësim të drejtpërdrejtë për konsumatorët dhe bizneset, në një periudhë kur kostot e energjisë mbeten një faktor kyç për ekonominë./ekofin.al
