Ndryshimet e fundit në udhëzimin për tatimin mbi të ardhurat prekin edhe mënyrën se si trajtohen punonjësit që kanë më shumë se një marrëdhënie punësimi, duke sjellë një rregull të ri për deklarimin e statusit personal.
Aktualisht, pika 61 e udhëzimit parashikon se çdo punëmarrës është i detyruar të plotësojë dhe të nënshkruajë një deklaratë për statusin e tij personal përpara fillimit të pagesës së pagës. Kjo deklaratë shërben si bazë për aplikimin e zbritjeve tatimore mujore, siç janë zbritjet për fëmijët në ngarkim apo për kategori të tjera të përfituesve.
Me dispozitën ligjore të shtuar, saktësohet se në rastet kur një individ ka më shumë se një punësim dhe një prej tyre është në administratën shtetërore, deklarata e statusit personal duhet të dorëzohet pikërisht te punëdhënësi në administratën publike.
Ky rregull lidhet drejtpërdrejt me funksionimin e sistemit të centralizuar të pagesave në sektorin publik, i cili administron në mënyrë të unifikuar listëpagesat dhe përllogaritjen e tatimeve. Duke e përqendruar deklaratën në një pikë të vetme, punëdhënësin publik, synohet të shmangen mbivendosjet apo aplikimet e dyfishta të zbritjeve tatimore.
Konkretisht, kjo do të thotë se një punonjës që, për shembull, punon njëkohësisht në një institucion shtetëror dhe në sektorin privat, nuk mund të përfitojë zbritjet mujore në të dy vendet e punës. Ato do të aplikohen vetëm përmes pagës në administratën shtetërore, ndërsa paga tjetër do të tatohet pa këto lehtësime mujore./ekofin.al
