Bie ritmi i rritjes së turistëve të huaj në mars. Referuar të dhënave të publikuara nga INSTAT për strukturat akomoduese, numri i vizitorëve të huaj u rrit me 27.3% krahasuar me të njëjtën periudhë të vitit të kaluar. Ndërsa në shkurt, kjo rritje ishte 32,2%. Gjithashtu edhe netqëndrimet kanë shënuar rënie në mars, ku rritja për jo rezidentët ishte në masën 32.1%, kundrejt 35,4% që ishte në muajin shkurt.
Numri më i madh i vizitorëve jorezidentë u shënua në zonat jobregdetare, kryesisht në rajonin qëndror të vendit dhe specifikisht në Tiranë, me 20.6% dhe në hotele ose njësi akomodimi të ngjashme (+27.6%).
Sa i përket shtetësisë së vizitorëve të huaj në mars 2025 të cilët kanë qëndruar në njësi akomodimi në Shqipëri, vijojnë të kryesojnë italianët, me 23%, ndjekur nga qytetarët e Kosovës, me 15% dhe më pas gjermanët, me 10%. Ndërsa turistët nga Mbretëria e Bashkuar dhe Franca kontribuan respektivisht me 7% dhe 3%. Pjesa tjetër e vizitorëve, në masën 42% ishin nga shtete të tjera. Të dhënat flasin për një rritje të fluksit të turistëve kryesisht nga vendet evropiane.
Sa i përket normës së shfrytëzimit të dhomave, për marsit ajo ishte 18,4%, në rritje krahasuar me të njëjtën periudhë të vitit të kaluar, kur ishte 17.3%. Norma e shfrytëzimit ka shënuar rritje edhe krahasuar me shkurtin 2025. Rritja e normës së shfrytëzimit mund të jetë një tendencë që tregon një prirje drejt formalizimit të sektorit të hotelerisë. Kjo edhe pas miratimit së fundmi nga Qeveria të normës së shfrytëzimit, si në sezon, ashtu edhe jashtë sezonit. /ekofin.al