Pas katër muajsh pritje dhe negociatash intensive, sot në orën 17:30 në Skoci pritet takimi vendimtar midis presidentit amerikan Donald Trump dhe presidentes së Komisionit Evropian Ursula von der Leyen.
Takimi do të zhvillohet në Golf Club Turnberry, pronë e presidentit amerikan, një vend i pazakontë për një takim kaq të rëndësishëm, por që sinjalizon nënshkrimin e një marrëveshjeje për të shmangur luftën tregtare.
Në 48 orët e fundit, negociatorët e dy palëve kanë dhënë garanci për zgjidhjen e disa nyjeve kyçe që kishin mbetur pezull. Në fillim, pikat e “mospajtimit” ishin rreth 20, ndërsa tani janë reduktuar në vetëm dy.
Një pikë kyçe kishte të bënte me tarifat doganore: BE-ja pranon një tarifë prej 15% për produktet e saj, ndërsa SHBA-të aplikojnë tarifa nga zero deri në 4.8% për mallrat e veta në tregun evropian.
Së fundmi, dy sinjale të forta kanë qetësuar Washingtonin.
Së pari, në samitin në Pekin me presidentin kinez Xi Jinping, Von der Leyen dhe presidenti i Këshillit Evropian, Antonio Costa, i kanë dërguar një mesazh të qartë Washingtonit: Bashkimi Evropian nuk do të hapë një kanal të veçantë preferencial me Kinën për të zëvendësuar SHBA-të.
Së dyti, BE ka hequr dorë nga plani për një taksë mbi kompanitë e mëdha teknologjike, duke u larguar kështu nga një pikë kritike që shqetëson Trumpin dhe sektorin amerikan të shërbimeve.
Nga ana tjetër, SHBA-të kanë shprehur gatishmërinë për të ulur tarifën doganore për automjetet në 15% (nga 27.5% aktualisht) dhe për ilaçet, për të cilat më parë kishte paralajmëruar tarifa deri në 200%.
Disa çështje të vogla mbeten pezull, si tarifat për gjysmëpërçuesit, çelikun dhe aluminin, por ato konsiderohen tashmë të “dorës së dytë”.
BE dhe SHBA-të janë gjithashtu gati të heqin tarifat mbi aeroplanët dhe pijet alkoolike, duke treguar vullnet për kompromis të gjerë për të shmangur një mosmarrëveshje me pasoja të rënda ekonomike.
