Presidenti amerikan Donald Trump ka anuluar planet për zhvillimin e projekteve të reja të energjisë së erës në ujërat federale, duke shënuar një tjetër hap të rëndësishëm në frenimin e rritjes së sektorit të energjisë së rinovueshme në SHBA.
Byroja e Menaxhimit të Energjisë Oqeanike (BOEM) njoftoi të mërkurën se po tërheq më shumë se 3.5 milionë hektarë det (1.42 milionë hektarë tokë detare) që ishin caktuar për zhvillimin e erës në brigjet e Teksasit, Luizianës, Meinit, Nju Jorkut, Kalifornisë dhe Oregonit, si dhe në Atlantikun qendror. Sipas BOEM, nuk do të caktohen më sipërfaqe të mëdha për “zhvillime spekulative të erës”.
Vendimi përbën një tërheqje të qartë nga plani pesëvjeçar i shpallur nga paraardhësi i Trump, Joe Biden, për të dhënë me qira zonat federale detare për zhvillimin e energjisë së erës. Prej marrjes së detyrës në janar, Trump ka nisur të përmbysë politikat energjetike të administratës së mëparshme, duke promovuar fuqishëm rritjen e prodhimit të naftës, gazit dhe qymyrit përmes një sërë urdhrash ekzekutivë.
Sekretari amerikan i Brendshëm, Doug Burgum, deklaroi se do t’i jepet fund trajtimit preferencial ndaj projekteve të energjisë së erës dhe diellit, duke i cilësuar ato si “të pasigurta” dhe “të kontrolluara nga të huajt”. Departamenti gjithashtu po shqyrton tërheqjen e zonave tokësore federale me potencial të lartë për energjinë e erës në tokë, në mënyrë që të balancohet zhvillimi energjetik me përdorime të tjera si rekreacioni dhe kullotat. Trump ka shprehur në mënyrë të përsëritur armiqësi ndaj energjisë së rinovueshme, veçanërisht asaj me erë në det të hapur.
Kjo qasje e tij ka nxitur kritika të forta nga shkencëtarët e klimës dhe grupet mjedisore. Të enjten, Departamenti Amerikan i Energjisë u kritikua gjerësisht pasi lavdëroi qymyrin si burim energjie, një veprim që u konsiderua si i shkëputur nga realiteti përballë krizës së klimës dhe fatkeqësive natyrore gjithnjë e më ekstreme.
Gjatë një vizite në Skoci këtë javë, Trump e quajti energjinë me erë “një mashtrim që nuk funksionon” dhe i përshkroi turbinat me erë si “përbindësha të shëmtuar”. Në konferencën për shtyp me kryeministrin britanik Keir Starmer, ai i bëri thirrje Mbretërisë së Bashkuar të mbështetet te nafta dhe gazi i Detit të Veriut. Deklarata të ngjashme përsëriti edhe në një konferencë me presidenten e Komisionit Evropian, Ursula von der Leyen, duke thelluar më tej hendekun mes politikave të tij dhe realitetit të krizës klimatike globale./Përshtati nga Euronews, ekofin.al
