Tregu i sigurimeve u rrit me afro 8% në 6-mujorin e parë të vitit krahasuar me të njëjtën periudhë të vitit të kaluar. Referuar të dhënave të publikuara nga Autoriteti i Mbikëqyrjes Financiare, primet e shkruara bruto në 6-mujor arritën në rreth 12.8 miliardë lekë, me një rritje prej 950 milionë lekë, krahasuar me 6-mujorin 2024.
Të njëjtën rritje me primet shënuan edhe kontratat, duke arritur në mbi 755 mijë në fund të qershorit, ose 8% më shumë se e njëjta periudhë e vitit të kaluar.
Tregu i Jo-jetës u rrit me 7.6%, me një vëllim prime prej 11.6 miliardë lekë. Në këtë treg, numri i kontratave arriti në mbi 671 mijë, me një rritje prej 7.18% krahasuar me Janar-Qershor 2024.
Rritje të qëndrueshme shënoi edhe tregu i Jetës. Vëllimi i primeve të shkruara bruto në këtë treg arriti në 1.15 miliardë lekë, ose 12.33% më shumë sesa e njëjta periudhë e vitit të kaluar. Rritja më e fortë në këtë treg u shënua në numër kontratash, me 15.5%, duke arritur në 84,729 kontrata.
Dëmet e paguara në nivel tregu për 6-mujorin shënuan një rënie të lehtë, me 0.73%. Shoqëritë e sigurimit, të Jo-Jetës dhe të Jetës kanë paguar mbi 4 miliardë lekë dëme në 6-mujorin e parë të vitit.
Dëmet e paguara në numër janë rritur me 1,528 dosje më shumë në janar-qershor 2025, duke arritur në 37,858 praktika të paguara, nga 36,124 dëme janë paguar nga shoqëritë e sigurimit të Jo-Jetës dhe 1,734 nga shoqëritë e sigurimit të Jetës.
Ndërkohë, sa i përket sigurimit TPL, në 6-mujorin e parë të vitit, konstatohet një rritje thuajse e ekuilibruar mes primeve të shkruara bruto dhe dëmeve të paguara bruto. Në këtë kategori sigurimi, primet u rritën me rreth 13.4% në 6-mujor, krahasuar me të njëjtën periudhë të vitit të kaluar, ndërsa dëmet u rritën me 12%. /ekofin.al
