Tregu i sigurimeve, pas nisjes së vitit disi të ngadaltë, duket se i është rikthyer ritmeve të rritjes. Sipas të dhënave të bëra publike nga Autoriteti i Mbikëqyrjes Financiare, për periudhën janar-prill 2022, shoqëritë e sigurimit kanë siguruar mbi 5.8 miliardë lekë nga primet e shkruara, me një rritje prej 9% krahasuar me të njëjtën periudhë të një viti më parë. Gjithashtu, edhe numri i kontratave të reja të sigurimit ka ardhur në rritje, me 24.85% krahasuar me vitin e kaluar.
AMF informon se tregu mbetet i orientuar tek sigurimet e Jo-Jetës, të cilat sollën 92.12% të vëllimit të përgjithshëm të primeve, ndërsa sigurimet e Jetës kanë 7.83%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 42.93% dhe primet e shkruara bruto të sigurimit të detyrueshëm zënë 57.07% të totalit të tregut.
Gjatë periudhës janar-prill 2022, dëmet e paguara bruto në tregun e sigurimeve, arritën në rreth 2,173 milionë lekë, ose 14.54% më pak se në periudhën janar-prill 2021.
Dëmet e paguara bruto në sigurimin motorik për periudhën janar-prill 2022 kapën vlerën 1,396 milionë lekë, duke pësuar një rritje me rreth 1.03% krahasuar me të njëjtën periudhë të një viti më parë.
Rritje në veçanti ka shënuar si produkt Kartoni Jeshil, edhe për shkak të heqjes së kufizimeve dhe lëvizjeve më të shumta të qytetarëve shqiptarë me mjetet e tyre në shtetet kufitare, kryesisht në Greqi.
