47.459 mjete janë regjistruar në 6 muajt e parë të vitit 2025, shifër kjo në rënie nga afro 50 mijë mjete të regjistruara në të njëjtën periudhë të një viti më parë. Pas rritjes vit pas viti, për herë të parë këtë vit tregu i makinave po shfaq një lloj mbingopjeje.
Referuar origjinës së mjeteve, është ruajtur trendi i vënë re edhe në muajt e tjerë të këtij viti, ku kryeson Koreja e Jugut, me 20,5%, pasuar nga Italia me 16%, Gjermania me 15,5%, Zvicra me 8,8%, SHBA me 7,9% dhe Kina me 7,8%.
Mjetet koreane parapëlqehen kryesisht pasi kanë çmime më të lira se makinat e importuara nga tregjet tradicionale, Gjermania dhe Italia. Gjithashtu vihet re një tendencë në rritje e importeve nga Kina dhe kjo kryesisht me makina elektrike.
Sipas të dhënave të DPSHTRR vërehet një rritje e mjeteve të gjeneratës së fundit, pra makinat me vit prodhimi të tri viteve të fundit, të cilat janë shtuar me 8862.
Po ashtu, gjatë kësaj periudhe, janë regjistruar 3796 çregjistrime të përhershme ose 18,3% më shumë krahasuar me të njëjtën periudhë të vitit të kaluar.
DPSHTRR u bën thirrje të gjithë drejtuesve të rinj dhe ekzistues të mjeteve që të respektojnë rregullat e qarkullimit rrugor, të kryejnë kontrollet periodike të mjeteve dhe, përpara se të importojnë një mjet, të verifikojnë kategorinë mjedisore të tij.
