Kryeministri Edi Rama deklaroi sot se, Shqipëria do të prodhojë në vend paratë dhe të gjitha llojet e letrave me vlerë.
Në fjalën e tij në në Konferencën rajonale “Formësimi i së Ardhmes së GovTech”, Rama u shpreh se, qeveria do të firmosë javët e ardhshme një marrëveshje me Emiratet e Bashkuara Arabe për të transformuar tërësisht Shtypshkronjën e Letrave me Vlerë.
“Ne jemi duke përgatitur, dhe besoj që do ta firmosim në javët e ardhshme, një marrëveshje me Emiratet e Bashkuara për të transformuar tërësisht Shtypshkronjën e Letrave me Vlerë”, tha Rama.
Ambicia jonë, shtoi kreu i qeverisë, “është që në një kohë jo të largët, të arrijmë jo vetëm të prodhojmë në vend paratë, të prodhojmë në vend të gjitha llojet e letrave me vlerë, përfshirë edhe të gjithë çfarë ka në botën digjitale, për sa i përket identifikimit përmes telefonit dhe jo më përmes një karte identiteti nëpër xhepa, duke arritur që në të gjithë këtë sistem me këto pjesë që ju bëra me dije të kemi një qeverisje që në 2030-ën të jetë e një niveli shumë më të lartë, për sa i përket standardeve të respektit për ligjin, standardet për respektin për qytetarin dhe nga ana tjetër standardet e respektit për vendin tonë në arenën ndërkombëtare”.
Kryeministri siguroi se Shqipëria do të jetë vendi i parë në rajon që do të realizojë prokurime publike me 90% të procesit të realizuar përmes inteligjencës artificiale. Rama tha se kjo do të sjellë një nivel objektiviteti e transparence të pakonkurrueshme.
Kryeministri theksoi se ky hap lidhet me një fazë të re të luftës kundër korrupsionit, ndërsa solli në vëmendje se raporti i SIGMA-s e rendit aktualisht Shqipërinë të parën në rajon për sa i përket prokurimeve publike.
“Bëhet fjalë për një model inovativ me Inteligjencë Artificiale për të realizuar prokurimet publike. Ne tanimë jemi në fazë tjetër komplet me prokurimet publike dhe këtë e tregon qartësisht raporti i progresit i BE-së, si dhe tryeza jonë e negociatave për anëtarësim ku pavarësisht të gjitha që stërthuhen, në aspektin e prokurimeve publike ne nuk kemi asnjë piketë të ndërmjetme dhe në bazë të raportit të SIGMA-s jemi në vendin e parë në rajon”, tha Rama.
Rama shprehu bindjen se me modelin e inteligjencës artificiale që po ndërtohet, rreth mesit të mandatit të katërt Shqipëria do të jetë vendi i parë që do të realizojë prokurime publike me 90% të procesit pa njeriun dhe me një nivel objektiviteti e transparence të pakonkurrueshme nga çfarëdolloj komisioni prokurimesh.
“Kjo do të jetë një tjetër arritje falë këtij besimi që na jep teknologjia, sepse ndryshe procesi do të bazohej te sensibilizimi, trajnimi e me radhë”, tha Rama.
