Drejtori i Përgjithshëm Ekzekutiv i OTP Bank Shqipëri, z. Bledar Shella, është vlerësuar këtë vit nga grupi bankar hungarez me çmimin “András Fáy”. Ky çmim i jepet zakonisht të gjithë atyre personaliteteve, drejtuesve, funksionarëve që kanë dhënë një kontribut të posaçëm në funksionimin e sukseshëm dhe inovativ të grupit bankar.
Vlerësimi iu akorduar z. Shella nga Kryetari i Bordit Drejtues dhe CEO i OTP Group, Dr. Sándor Csányi. Pjesë e motivacionit për akordimin e këtij vlerësimi ishte “Nën drejtimin e tij, në mbi pesë vitet e fundit, banka ka marrë vlerësime prestigjioze sikurse “Banka më e mirë në Shqipëri”, vlerësim i akorduar nga “Euromoney” për katër vite radhazi. The Banker, gjithashtu ka vlerësuar së fundmi performancën e Bankës OTP Albania, me çmimin “Best Business Bank”.
Profesionalizmi i tij i shquar ka kontribuar në mënyrë të konsiderueshme në integrimin e dy bankave gjatë procesit të bashkimit me Alpha Bank Albania. Krijimi i vlerave nga ana e tij është i padiskutueshëm, duke motivuar stafin me profesionalizmin dhe arritjet e tij. Ai është një lider energjik, shembull, këmbëngulës në kërkimin e rezultateve më të mira.”
Pas një eksperience tetëvjeçare në Bankën e Shqipërisë, z. Shella iu bashkua Bankës Societe Generale Albania në muajin Korrik 2008 si Drejtor i Departamentit të Manaxhimit të Riskut.
Në Mars të vitit 2015 ai u propozua dhe u zgjodh Zëvendës Drejtor i Përgjithshëm i Bankës Societe Generale Albania, në krye të Divizionit Retail. Duke filluar nga muaji Dhjetor 2018, Z. Shella u emërua Drejtor i Përgjithshëm Ekzekutiv i Bankës Societe Generale Albania.
Ai e mori drejtimin e bankës në atë rast deri në mbylljen e procedurave të kalimit të pronësisë nga Societe Generale te grupi OTP Nyrt. Por për shkak të udhëheqjes së suksesshme jo veteëm të procedurave të kalimit të pronësisë, por më tej edhe atyre të blerjes së Alpha Bank, z. Shella fitoi besimin për të vijuar drejtimin e OTP Bank Shqipëri edhe për vitet në vazhdim.
Në veçanti gjatë të vitit të kaluar, por edhe përgjatë këtij viti, referuar rezultateve të 9-mujorit, OTP Bank Albania ka konsoliduar më tej pozitat si banka e tretë më e madhe në Shqipëri, me një portofol kredie që ka tejkaluar 1 miliardë Euro në fund të shtatorit 2024 dhe me një performancë shumë të mirë financiare.
Në këtë kuadër, edhe akordimi i çmimit András Fáy vjen në vazhdën e gjithë këtyre rezultateve të mira dhe transformimit të bankës nga ana e CEO-s, Bledar Shella. Çmimi András Fáy u themelua në vitin 1984, me rastin e 35-vjetorit të themelimit të Bankës Kombëtare të Kursimeve. Themeluesi i saj ishte një nga figurat më të gjithanshme të epokës së reformës, themeluesi i bankës së parë hungareze të kursimeve, e cila konsiderohet si paraardhësi historik i OTP Bank Hungari. /ekofin.al
