5 vjet pas licencimit të shoqërisë së fundit që u bë pjesë e tregut të sigurimeve, Albsig Jetë, në shtator të 2019, Autoriteti i Mbikëqyrjes Financiare i hap rrugë një tjetër shoqërie sigurimi për të operuar në tregun e Jetës.
Bëhet fjalë për shoqërinë “Vienna Sigurim Jete” sh.a, të krijuar nga Intersig, që në mbledhjen e fundit të Bordit të AMF më 25 Korrik, ka marrë miratimin paraprak, një hap përpara licencimit zyrtar për të ushtruar aktivitet në sektorin e sigurimeve të Jetës.
Ndryshe nga sigurimet e Jo-Jetës, që zënë edhe pjesën kryesore të tregut të sigurimeve në Shqipëri që prej krijimit të tij, sigurimet e Jetës nuk janë shumë të zhvilluara. Deri tani, pjesa kryesore e shoqërive që operonin në segmentin e Jo-Jetës, si Sigal, Insig e Albsig, kishin krijuar shoqëri edhe në tregun e Jetës. Intersig VIG bëhet shoqëria më e fundit që i bashkohet këtij trendi.
Sipas të dhënave nga AMF, primet nga sigurimet e Jetës gjatë muajit janar – qershor 2024, arritën rreth 1,027 milionë lekë, ose 14.39% më shumë se në të njëjtën periudhë të një viti më parë.
Megjithatë, tregu mbetet i orientuar tek sigurimet e Jo-Jetës, të cilat sollën 91.31% të vëllimit të përgjithshëm të primeve, ndërsa sigurimet e Jetës kanë 8.64% . Ekofin.al
