Platformat e njohura të mediave sociale rekomandojnë “nivele tronditëse të përmbajtjes së dëmshme” për adoleshentët, thanë studiuesit.
Platformat e rrjeteve sociale vazhdojnë t’i ekspozojnë adoleshentët ndaj përmbajtjeve rreth vetëvrasjes, vetëdëmtimit dhe “depresionit intensiv”, sipas një raporti të ri.
Fondacioni britanik Molly Rose Foundation krijoi llogari në TikTok dhe Instagram, duke u shtirur si një vajzë 15-vjeçare që më parë kishte ndërvepruar me këtë lloj përmbajtjeje. Grupi tha se pothuajse çdo video që shfaqej në dy platformat lidhej me vetëvrasjen, depresionin ose vetëdëmtimin.
Faqja For You e TikTok-ut, për shembull, rekomandonte rregullisht video që “promovonin dhe madhëronin hapur vetëvrasjen” dhe madje sugjeronin metoda konkrete vetëvrasjeje, thuhej në raport.
Në Instagram, përdoruesit e rremë kishin më shumë gjasa të ndesheshin me këtë lloj përmbajtjeje tek Reels, shërbimi i videove të shkurtra të platformës.
“Algoritmet e dëmshme vazhdojnë të bombardojnë adoleshentët me nivele tronditëse të përmbajtjes së dëmshme, dhe në platformat më të përdorura nga të rinjtë kjo mund të ndodhë në një shkallë industriale,” tha Andy Burrows, drejtori ekzekutiv i Molly Rose Foundation.
Testet u kryen javët para se të hynin në fuqi rregullat e sigurisë për fëmijët të përcaktuara nga Ligji për Sigurinë Online në Mbretërinë e Bashkuar, në fund të korrikut. Ndër masat e tjera, ligji kërkon që platformat sociale të “heqin menjëherë përmbajtjen e paligjshme për vetëvrasjen dhe vetëdëmtimin” dhe të “mbrojnë në mënyrë proaktive përdoruesit” nga ky lloj përmbajtjeje.
Por fondacioni tha se gjetjet e fundit tregojnë se pak ka ndryshuar që nga viti 2017, kur Molly Russell, 14 vjeç, i dha fund jetës në Mbretërinë e Bashkuar. Një zyrtar i çështjes arriti në përfundimin se ekspozimi ndaj përmbajtjeve të dëmshme online kontribuoi “më shumë se minimalisht” në vdekjen e saj.
Grupi i bëri thirrje rregullatorit të komunikimeve në MB, Ofcom, të ndërmarrë hapa shtesë për të mbrojtur të rinjtë nga përmbajtjet e dëmshme online, si dhe qeverisë të forcojë Ligjin për Sigurinë Online.
Një zëdhënës i TikTok kundërshtoi gjetjet, duke i thënë Euronews Next se ato “nuk pasqyrojnë përvojën reale të njerëzve në platformën tonë, gjë që edhe vetë raporti e pranon”. Zëdhënësi tha se TikTok heq në mënyrë proaktive 99 për qind të përmbajtjes që shkel standardet e tij.
Një zëdhënës i Metas, kompania mëmë e Instagram dhe Facebook, gjithashtu nuk u pajtua me përfundimet e raportit, duke thënë se metodologjia ishte “e kufizuar”.
Ai shtoi se “dhjetëra mijëra” adoleshentë tani kanë llogari të tipit Teen Accounts në Instagram, të prezantuara vitin e kaluar. Këto llogari kanë funksione të integruara sigurie, si kufizimi i qasjes së adoleshentëve në përmbajtje të ndjeshme.
“Ne i zhvilluam Teen Accounts për të ndihmuar në mbrojtjen e adoleshentëve online dhe vazhdojmë të punojmë pareshtur për ta bërë këtë,” tha zëdhënësi./Përshtati nga Euronews, ekofin.al
