Pas rekordeve të njëpasnjëshme me rritjen e ndjeshme të numrit të pasagjerëve, ku viti 2024 kulmoi me 10.7 milionë pasagjerë që përdoren infrastrukturën dhe shërbimet e Aeroportit Ndërkombëtar të Tiranës, tashmë paralelisht me investimet (zgjerimin e pistës, rritjen e mëtejshme të sipërfaqes së terminalit, si edhe zgjerimin e parkingut, apo modernizimin dhe digjitalizimin e mëtejshëm të sistemeve), TIA po i kushton vëmendje edhe rritjes së mëtejshme të sigurisë dhe certifikimeve ndërkombëtare në këtë drejtim.
Drejtuesit e aeroportit janë të vendosur dhe të përkushtuar të mos bëjnë asnjë kompromis, duke siguruar standardet më të larta për sigurinë e pasagjerëve dhe të vetë aeroportit. Në këtë kuadër, Aeroporti Ndërkombëtar i Tiranës mirëpriti për herë të parë Programin e Rishikimit të Sigurisë “ACI APEX” në datat 27-31 janar, duke përforcuar angazhimin ndaj standardeve më të larta të sigurisë së aeroportit dhe përsosmërisë operacionale. Certifikimi nga Këshilli Ndërkombëtar i Aeroporteve (ACI) e vendos TIA-n në një tjetër nivel, paralel me atë të aeroporteve më të njohura evropiane dhe ndërkombëtare.
Rëndësia e certifikimit ndërkombëtar “ACI APEX”
Programi “ACI World APEX” është një iniciativë e njohur globalisht që ndihmon aeroportet të optimizojnë masat e tyre të sigurisë dhe mjedisit në përputhje me rregulloret dhe standardet e Organizatës Ndërkombëtare të Aviacionit Civil (ICAO) dhe Agjencisë së BE-së për Sigurinë e Aviacionit (EASA).
Nëpërmjet procesit të rishikimit në vend, ekspertët e industrisë vlerësojnë operacionet e aeroportit dhe ofrojnë udhëzime të përshtatura për të rritur pajtueshmërinë dhe praktikat më të mira.
Audituesit e Airports Council International (ACI) realizuan një auditim në të gjitha zonat e aeroportit për të vlerësuar standardet në përputhje me rregullat ndërkombëtare. Auditimi ka sjellë edhe disa rekomandime, të përfshira në planin e veprimit të aeroportit.
Duke marrë pjesë në këtë program, TIA vazhdon të forcojë angazhimin e saj për sigurinë, duke siguruar përmirësim të vazhdueshëm dhe përsosmëri në funksionimin e aeroportit.
Vështrimet dhe rekomandimet nga rishikimi i APEX do të mbështesin përpjekjet e aeroportit në ruajtjen e niveleve më të larta të sigurisë dhe efikasitetit për pasagjerët, linjat ajrore dhe palët e interesuara.
Kjo nismë është një hap kyç në rrugëtimin e TIA-s drejt ruajtjes dhe përmirësimit të certifikimit, duke nxitur një mjedis të sigurt dhe të mbrojtur aeroporti./ekofin.al
