Edhe pse Rruga e Arbërit nuk ka përfunduar ende, Qeveria po merr masa për zëvendësimin e linjës elektrike për fshatrat e zonës, si edhe ndriçimin e Tunelit të Murrizit.
Drejtoria Rajonale OSHEE Tiranë ka shpallur tenderin me vlerë 295 milionë Lekë pa TVSH për zhvillimin e rrjetit 20KV për përmirësimin e cilësisë së furnizimit me energji elektrike të zonave përgjatë Rrugës së Arbrit dhe furnizimin e tunelit të Murrizit.
Kohëzgjatja e kontratës për punën e ndërtimit për linjat e energjisë elektrike do të jetë 9 muaj.
Zona ku kalon gjurma e Rrugës së Arbrit ndodhet në lindje të qytetit të Tiranës dhe kalon nëpër fshatrat Tujan, Zall Dajt, Besh, Kurte, Zallbastar, Hysaj dhe Maricej, fshatra të cilët furnizohen nga një rrjet i tensionit të mesëm 10kv, nga nënstacioni i Qafë Mollë, tepër i amortizuar dhe i vjetër që parimin e punës e ka 2 faza plus tokë dhe humbjet janë shumë të mëdha.
Projekti parashikon ndërtimin e dy fiderave të rinj kabllorë me 20kV, njëri prej të cilëve do të furnizojë me energji elektrike fshatrat përgjatë Rrugës së Arbrit, konkretisht fideri M8 me gjatësi 13.2 km, ndërsa fideri tjetër M9 me gjatësi 13.47 km do të furnizojë tunelin e Murrizit në Rrugën e Arbrit.
Rruga e Arbërit ka nisur ndërtimin shumë vite më parë, por ato janë zgjatur tej afateve të parashikuara dhe gjithashtu kostot janë shtuar, kjo për shkak të problematikave që kanë ardhur kryesisht nga terreni i vështirë dhe kompozimi i paqëndrueshëm i tokës, sidomos në zonën e Tunelit të Murrizit. Qeveria synon ta përfundojë rrugën vitin e ardhshëm dhe tashmë ka marrë masa dhe për ndriçimin e tunelit, si edhe me zëvendësimin e linjës së furnizimin me energji për fshatrat përgjatë gjurmës së rrugës. /ekofin.al
