Investimet e huaja direkte kanë vijuar trendin rritës edhe në muajt e parë të vitit 2025. Referuar të dhënave të publikuara nga Banka e Shqipërisë, investimet e huaja direkte arritën në 362 milionë euro në tre-mujorin e parë 2025, nga 354 milionë euro që ishin në të njëjtën periudhë të vitit të kaluar.
“Fluksi hyrës nga investimet e huaja direkte shënon 362 milionë euro, i zgjeruar në terma vjetorë me 2%. Injektimi me kapital të ri dhe riinvestimi u zgjeruan me 8 milionë euro në terma vjetorë”, thekson në njoftim Banka e Shqipërisë.
Përsëri, ashtu si edhe në vitet e fundit, investimi në sektorin imobiliar mbetet në krye të listës. Kështu të huaj kanë investuar rreth 98 milionë euro përmes blerjes së pronave në 3 muajt e parë të vitit.
“Gjatë tremujorit të parë 2025, flukset valutore hyrëse në formën e investimeve të huaja direkte ishin të përqendruara kryesisht në pasuri të paluajtshme (në masën 27%), sektorin e ndërmjetësimit financiar (në masën 21%), hidrokarbureve (në masën 14%), energjitikës (në masën 6%), si dhe komunikacionit (në masën 4%)”, thotë BSH.
Vitin e kaluar, investimet e huaja direkte arritën një rekord të ri, prej 1.58 miliardë euro. Vitet e fundit, IHD ka njohur trend rritës dhe fokusi kryesor i tyre ka qënë sektori i ndërtimit dhe specifikisht blerja e pronave. /ekofin.al
