Drejtoria e Përgjithshme e Tatimeve ka njoftuar se sot më 30 dhjetor ishte afati i fundit për bizneset për të rifreskuar në sistemin e-filing llogaritë e sakta bankare për rimbursimin e kësteve të parapaguara të tatim fitimit, sipas aktit normativ për tatimpaguesit që ofrojnë shërbime profesionale.
Sipas njoftimit të tatimeve, deri më sot, janë rimbursuar 95% e tatimpaguesve. Shuma totale e rimbursuar është rreth 606 milionë lekë, ose rreth 6 milionë euro.Gjithsej janë rimbursuar 7751 profesionistë të lirë. Vetëm gjatë ditës së sotme janë bërë 244 rimbursime.
Tatimet informojnë se pjesa e mbetur e tatimpaguesve që ofrojnë shërbime profesionale që kanë mbetur pa rimbursuar duhet që duke nisur nga viti i ardhshëm t’i ndjekin procedurat përmes drejtorive rajonale.
Në janar të këtij viti hyri në fuqi ligji i ri për tatimin mbi të ardhurat, që parashikonte tatimin me 13% të kategorive të bizneseve që ofronin shërbime profesionale. Por Gjykata Kushtetuese e rrëzoi këtë dispozitë të ligjit në fund të qershorit, duke ndezur edhe debatin se çfarë do të bëhej me këstet e paguara tashmë nga subjektet.
Pas disa muajsh, Qeveria miratoi në fillim të dhjetorit aktin normativ për të kthyer paratë mbrapsht te bizneset e shërbimeve profesionale që kishin parapaguara. Tashmë, kjo procedurë konsiderohet e mbyllur nga tatimet për 95% prej tyre. /ekofin.al
