Drejtoria e Përgjithshme e Tatimeve ka publikuar në rrjetet sociale një material informues në lidhje me subjektet që janë të përjashtuara nga taksat.
Sipas tatimeve, disa sektorë janë të përjashtuar nga tatimi, bazuar në ndryshimet ligjore të “Tatimit mbi të ardhurat”.
Kështu, do të paguajnë vetëm 5% tatim fitim, bizneset që operojnë në agroturizëm, deri në vitin 2029, shoqëritë e bashkëpunimit bujqësor, ose kooperativat, bizneset që prodhojnë apo zhvillojnë pajisje software, që janë regjistruar përpara hyrjes në fuqi të ligjit, si edhe subjektet që operojnë në industrinë automotive deri në vitin 2029.
Ndërkohë, tatimet bëjnë me dije se norma e tatimfitimit do të jetë 0, për individët tregtarë, të vetëpunësuarit dhe entitetet me të ardhura bruto deri në 14 milionë lekë në vit, deri në vitin 2029. Këtu përfshihen edhe profesionet e lira, që u tatuan fillimisht me shkallëzim 15 dhe 23%, por që ky nen u rrëzua nga Gjykata Kushtetuese vitin e kaluar.
Gjithashtu, tatim zero mbi të ardhurat do të vijojnë të kenë edhe strukturat akomoduese (hotele, resorte me 4 dhe 5 yje), si një masë incentivuese për të zhvilluar turizmin. /ekofin.al
