Drejtoria e Përgjithshme e Tatimeve ka evidentuar rreth 3.4 milionë euro të ardhura të padeklaruara në një rast të dyshuar evazioni fiskal në sektorin e ndërmjetësimit të pasurive të paluajtshme.
Sipas Administratës Tatimore, rasti është identifikuar në kuadër të kontrolleve dhe verifikimeve intensive që po zhvillohen ndaj agjencive imobiliare, si pjesë e aksionit kombëtar për formalizimin e këtij sektori.
Hetimet janë përqendruar te krahasimi i aktivitetit real ekonomik me deklarimet e paraqitura pranë Administratës Tatimore, pas përfundimit të afatit të vetëdeklarimeve për vitin fiskal 2025.
Nga verifikimet e kryera deri më tani, sipas Tatimeve, një rrjet agjencish imobiliare që operon në formën e franshizës, me mbi 25 zyra në Tiranë, Durrës, Vlorë, Korçë dhe Sarandë, dyshohet se ka shmangur detyrime të konsiderueshme tatimore.
Dyshimet lidhen me mosdeklarimin e komisioneve dhe mospasqyrimin e plotë të transaksioneve të realizuara nga shitblerja e pronave. Nga analiza e të dhënave të administruara në databazën qendrore të shitjeve, e cila përfshin aktivitetin e të gjitha zyrave të këtij rrjeti, është evidentuar mosdeklarimi i të ardhurave nga komisionet e shitblerjes së pronave në vlerën rreth 3.4 milionë euro.
Administrata Tatimore thotë se këto gjetje ngrenë dyshime të forta për evazion fiskal. Drejtoria e Hetimit Tatimor po vijon analizën dhe verifikimin e të dhënave edhe për subjekte të tjera, ndërsa në çdo rast kur do të evidentohen elementë të veprës penale të evazionit fiskal, çështjet do t’i referohen organit të Prokurorisë.
Tatimet bëjnë të ditur se kontrollet dhe hetimet në sektorin e ndërtimit do të vijojnë, duke përdorur analizën e avancuar të të dhënave dhe instrumentet ligjore në dispozicion, me qëllim garantimin e zbatimit të legjislacionit tatimor dhe luftën kundër evazionit fiskal. /ekofin.al
