Një inflacion në objektiv dhe rritje ekonomike të mëtejshme këto janë parashikimet që kreu i Bankës Qendrore rendit si të rëndësishme për vitin 2024. Në mbledhjen e përvitshme me mediat, Gent Sejko tha se gjatë vitit 2023, veprimtaria e sektorit bankar shënoi një rritje me 3%, në terma të totalit të aktiveve dhe depozitave të klientëve dhe portofoli i kredisë shfaqi rritje të dominuar nga kredia në monedhën vendase dhe kredia për prona të patundshme.
Sejko vlerësoi rolin e medias në informimin e publikut, teksa shprehu besimin në profesionalizmin e gazetarëve, që siç tha ai, “kanë ndihmuar në një transmetim më efikas të politikës monetare në ekonomi dhe në forcimin e stabilitetit të sektorit bankar shqiptar”. Duke u ndalur në përparësitë e industrisë bankare gjatë vitit 2023, Guvernatori vuri në dukje se, “deri në shtator, kredia kapërceu vlerën prej 720 miliardë lekësh, ndërsa depozitat e klientëve në banka kapërcyen vlerën 1,556 miliardë lekë, shifra që tregojnë se sektori ka burime të mjaftueshme, për financimin e ekonomisë. Niveli i kredive me probleme qëndroi në 5.1 %, por pozitiv është fakti që niveli i mbulimit me provigjione të këtij portofoli është rritur në 71 % (nga 67 % vitin e kaluar).
Niveli i kapitalizimit të sistemit bankar vijoi të rritet edhe këtë vit, në 19.63 %. Ndërsa zhvillime mjaft pozitive kemi pasur edhe në përmirësimin e infrastrukturës së pagesave, ndihmuar edhe nga përmirësimi i kuadrit rregullator në fushën e sistemeve të pagesave. Për të dytin vit radhazi, sistemi AIPS Euro tashmë po vijon të japë frytet e tij në sistemin bankar dhe në ekonominë shqiptare”, u shpreh Guvernatori.
Më tej Sejko tha se, transaksionet ndërbankare në euro për klientë brenda vendit janë rritur rreth 42 % në 11 muajt e parë të vitit 2023. Përfitimet për aktorët ekonomikë janë rritur ndjeshëm, duke i kursyer ekonomisë shqiptare të paktën 22 milionë euro. Përdorimi i sistemit, përtej reduktimit të kostove të transaksioneve, ka ndikuar në shkurtimin e kohës së nevojshme dhe kostove për administrimin e parasë fizike.Sot mbi 70 % e popullsisë ka një llogari bankare dhe të tjera zhvillime pozitive vijnë edhe nga zgjerimi i përdorimit të pagesave elektronike, ku me përfundimin e Strategjisë Kombëtare për Pagesat në Vlerë të Vogël, numri i pagesave elektronike për frymë në vit është gati dyfishuar në 18, përkundrejt objektivit prej 10 pagesash.
“Krahas forcimit të industrisë bankare në fokus të punës tonë është intensifikimi dhe zgjerimi i bashkëpunimin në kuadër të zbatimit të Strategjisë Kombëtare të Edukimit dhe Përfshirjes Financiare, një mekanizëm ky thelbësor për maksimizimin e efekteve të pritshme nga masat e marra deri më tani në kuadër të digjitalizimit dhe përfshirjes financiare”, pohoi Sejko.
