Leku ka vijuar sot trendin e tij të forcimit kundrejt shumicës së monedhave të huaja, duke reflektuar një moment stabiliteti monetar dhe rritje të besimit në ekonominë vendase. Të dhënat më të fundit nga tregjet valutore tregojnë se ndërsa shumica e valutave janë zhvlerësuar në raport me lekun, vetëm ari dhe argjendi kanë shënuar rritje domethënëse.
Euro, monedha më e përdorur në tregtinë dhe kursimet në Shqipëri, ka rënë më tej me 0.02 lekë, pasi preku pikën më të ulët historike të premten e kaluar, duke u këmbyer në nisje të kësaj jave me 97.82 lekë. Kjo tregon një dobësim të mëtejshëm të monedhës evropiane, ndikuar patjetër edhe nga aspektet sezonale. Gjithmonë muajt korrik dhe gusht kanë qenë “të vështirë” për euron, si pasojë e prurjeve të turistëve.
Për të mbajtur në kontroll kursin e euros, që ka vijuar zhvlerësimin, Banka e Shqipërisë, në tri ankandet e zhvilluara gjatë 2025, ka blerë 33.20 mln euro me një mesatare 11.07 mln, kundrejt mesatares prej 14.20 mln euro gjatë vitit 2024. Ndërkohë, edhe përgjatë muajit korrik, BSH ka ndërmarrë blerje valute, por ende nuk bëhet e ditur shuma e tërhequr nga tregu.
Dollari amerikan ka humbur 0.02 lekë duke u këmbyer me 83.72 lekë, ndërsa paundi britanik ka pësuar rënien më të theksuar të ditës: -0.56 lekë, duke zbritur në 112.83 lekë. Edhe franga zvicerane ka rënë lehtë me 0.02 lekë (105.06 lekë), duke ndjekur të njëjtën prirje me valutat kryesore.
Në dallim nga shumica e valutave, dollari kanadez ka fituar 0.10 lekë duke arritur në 61.21 lekë, ndërsa fituesit e vërtetë të ditës janë ari dhe argjendi.
Çmimi i arit është rritur me 2,604.81 lekë për ons, duke kapur vlerën 281,842.54 lekë, ndërsa argjendi është ngjitur me 123.98 lekë, duke u këmbyer me 3,269.32 lekë për ons. Rritja reflekton edhe situatën e tregjeve botërore për të pasur investime të sigurta, veçanërisht pas vendosjes së tarifave të Trump. /ekofin.al
