Koha e ditës kur pini një filxhan kafe mund të ulë rrezikun e një vdekjeje të hershme, sugjeron një studim i ri. Studimi zbuloi se njerëzit që pinin kafe në mëngjes kishin një rrezik më të ulët të vdekjes nga sëmundjet kardiovaskulare dhe kishin një rrezik më të ulët të vdekshmërisë sesa konsumatorët e kafesë gjatë gjithë ditës – por hulumtimi nuk mund të provonte nëse kafeja ishte shkaku i vetëm.
Dr. Lu Qi, studiuesi kryesor dhe drejtor i Qendrës Kërkimore të Obezitetit të Universitetit Tulane, tha se ndërsa studimi nuk tregon pse pirja e kafesë në mëngjes zvogëlon rrezikun, një shpjegim mund të jetë se konsumimi më vonë gjatë ditës mund të prishë orën e brendshme të trupit të një personi.
Studimi u publikua të mërkurën në revistën European Heart Journal.
Dr. Qi tha se nevojiten studime të mëtejshme për të parë nëse gjetjet e tyre mund të vërehen edhe në popullata të tjera, duke shtuar: “Ne kemi nevojë për prova klinike për të testuar ndikimin e mundshëm të ndryshimit të orës së ditës kur njerëzit pinë kafe”.
“Ky studim nuk na tregon pse pirja e kafesë në mëngjes zvogëlon rrezikun e vdekjes nga sëmundjet kardiovaskulare”, shpjegoi ai.
“Një shpjegim i mundshëm është se konsumimi i kafesë në pasdite ose në mbrëmje mund të prishë ritmet cirkadiane [ciklin 24-orësh të trupit tonë të ndryshimeve fizike, mendore dhe të sjelljes] dhe nivelet e hormoneve të tilla si melatonina.
Studiuesit nga Universiteti Tulane në New Orleans, vrojtuan 40,725 të rritur që kishin marrë pjesë në Anketën Kombëtare të Ekzaminimit të Shëndetit dhe Ushqyerjes në SHBA midis 1999 dhe 2018.
Ata u pyetën për konsumin e tyre të përditshëm të ushqimit dhe pijeve, dhe nëse pinin kafe, sa dhe kur. Sipas hulumtimit, 36% e atyre që morën pjesë ishin konsumues të kafesë në mëngjes dhe 14% pinin gjithë ditën.
Dr. Qi dhe ekipi i tij gjurmuan pjesëmarrësit për gati një dekadë, duke parë të dhënat e tyre të informacionit dhe shkaqet e vdekjes gjatë asaj periudhe kohore.
Gjatë ndjekjes pas pothuajse 10 vitesh, 4,295 njerëz vdiqën, duke përfshirë 1,268 vdekje të lidhura me sëmundjet kardiovaskulare.
Studiuesit zbuluan se ata që pinin kafe në mëngjes kishin 16% më pak gjasa të kishin vdekur në krahasim me ata që nuk pinin kafe dhe 31% më pak gjasa të kishin vdekur nga sëmundjet e zemrës.
Ata gjithashtu nuk panë ulje të rrezikut për ata që pinë kafe gjatë gjithë ditës në krahasim me ata që nuk pinë kafe./BBC
