Këshilli i Ministrave ka ndërmarrë një hap të rëndësishëm për të garantuar vijimësinë profesionale të studentëve të ekselencës që janë aktualisht pjesë e administratës shtetërore. Me një vendim të ri, qeveria ka vendosur të zgjasë afatin e kontratave të tyre të përkohshme, duke shmangur ndërprerjen e marrëdhënieve të punës në fillim të vitit 2026.
Vendimi, i propozuar nga Ministri i Shtetit për Administratën Publike dhe Antikorrupsionin, parashikon një përjashtim të posaçëm për vitin 2026. Ai synon të mbrojë studentët e përfshirë në programin e punësimit mbi bazën e thirrjes publike të dhjetorit 2024, të cilët ishin punësuar me kontrata njëvjeçare.
Me përfundimin e mandatit të tyre në fillim të këtij viti, ekzistonte rreziku real që këta të rinj të mbeteshin pa punë, deri në hapjen e procedurave të reja të rekrutimit. Për të shmangur këtë boshllëk institucional dhe pasiguri për punëmarrësit, qeveria ka vendosur që kontratat e tyre të shtyhen automatikisht.
Sipas ndryshimeve në vendimin e Këshillit të Ministrave, zgjatja e kontratave do të vijojë deri në përfundimin e procedurave të rregullta të punësimit, përmes konkurseve për statusin e nëpunësit civil ose sipas Kodit të Punës. Kjo u garanton studentëve vijimin e detyrës dhe pagesën e rregullt deri në finalizimin e rekrutimit të përhershëm.
Departamenti i Administratës Publike, ngarkohet për zbatimin e vendimit dhe mbikëqyrjes së procesit për të siguruar funksionimin normal të institucioneve dhe ruajtjen e stabilitetit administrativ.
