Në një kohë kur zhvillimi i shpejtë teknologjik po sjell sfida të reja për rendin dhe sigurinë publike, qeveria shqiptare ka miratuar një strategji të re gjithëpërfshirëse për luftën kundër krimit të organizuar dhe krimit kibernetik. Qëllimi i saj është i qartë: të forcohen kapacitetet ligjzbatuese për t’u përballur me kërcënimet moderne, duke mbrojtur sigurinë kombëtare dhe të drejtat digjitale të qytetarëve.
Strategjia Kombëtare për Parandalimin dhe Luftën kundër Krimit të Organizuar dhe Krimeve të Rënda 2026–2030 thekson se autoritetet duhet të zotërojnë aftësi të avancuara teknike, ligjore dhe operacionale, të mbështetura nga investime të vazhdueshme në teknologji moderne dhe trajnime të specializuara. Synimi është që Shqipëria të ndërtojë një sistem të aftë për të parandalur dhe hetuar në mënyrë efektive krimet që shfrytëzojnë hapësirën kibernetike – nga mashtrimet financiare online te abuzimet përmes rrjeteve të komunikimit.
Sipas dokumentit, kohët e fundit është identifikuar një trend rritës në përdorimin e kriptomonedhave për pagesa në tregun e lëndëve narkotike, duke mundësuar në këtë mënyrë fshehjen e gjurmëve financiare si dhe përdorimi i rrjetit DarkWeb për të shpërndarë lëndët narkotike duke ruajtur në këtë mënyrë anonimitetin e shpërndarësve të këtyrë lëndëve.
Gjithashtu, strategjia adreson krimet financiare dhe pastrimin e parave përmes përdorimit të kriptomonedhave, me synimin për të forcuar ndjekjen penale të këtyre fenomeneve dhe për të ndërtuar ekspertizë të specializuar brenda strukturave hetimore.
Në kuadër të planit të veprimit, parashikohen disa masa kryesore që përfshijnë hetime proaktive kundër mashtrimeve dhe aktiviteteve të paligjshme në internet; rritja e kapaciteteve hetimore dhe gjurmueshmërisë për identifikimin, arrestimin dhe ndjekjen penale të autorëve të krimeve kompjuterike; trajnime të vazhdueshme për punonjësit e Policisë së Shtetit mbi trendet e reja të krimit kibernetik; hartimi i manualeve udhëzuese për operatorët privatë mbi format e reja të krimeve digjitale;
Një tjetër shtyllë e rëndësishme është lufta kundër abuzimit seksual të fëmijëve në internet, përmes rritjes së numrit të reaguesve të trajnuar në çdo qark dhe ngritjes së kapaciteteve laboratorike të kriminalistikës kibernetike.
Në nivel afatgjatë, dokumenti parashikon rritjen e kërkimeve dhe inovacionit në fushën e hetimit kibernetik, në bashkëpunim me Akademinë e Sigurisë dhe partnerë ndërkombëtarë.
Kjo qasje synon të garantojë që Shqipëria të mos mbetet pas në garën teknologjike, por të jetë pjesë aktive e përpjekjeve globale për një hapësirë digjitale të sigurt, transparente dhe në shërbim të qytetarit./ekofin.al
