Qeveria miratoi të mërkurën një vendim të ri që synon të rrisë mbështetjen për ndërmarrjet sociale dhe të nxisë punësimin e grupeve në nevojë gjatë tre viteve të ardhshme. Vendimi përcakton krijimin e një fondi prej 210 milionë lekësh për periudhën 2026–2028, i cili do të përdoret për subvencionimin e ndërmarrjeve sociale të njohura nga ministria përgjegjëse për çështjet sociale.
Skema e mbështetjes fokusohet drejtpërdrejt te qytetarët, duke subvencionuar punësimin e personave nga grupet e pafavorizuara. Konkretisht, shteti do të mbulojë plotësisht pagën minimale dhe kontributet e sigurimeve shoqërore dhe shëndetësore për këta punonjës, duke lehtësuar kostot për ndërmarrjet dhe duke nxitur krijimin e vendeve të reja të punës. Çdo ndërmarrje sociale mund të përfitojë mbështetje për deri në 10 vende të reja pune, për një periudhë deri në tre vjet.
Për të përfituar nga kjo skemë, ndërmarrjet duhet të paraqesin një projekt 3-vjeçar dhe të provojnë rritjen e punësimit nga kategoritë në nevojë. Një tjetër kusht i rëndësishëm është që të paktën 30% e të punësuarve të jenë pjesë e programeve të mbrojtjes sociale, ndërsa kontratat e punës duhet të kenë një kohëzgjatje jo më pak se tre vjet, duke garantuar stabilitet për punëmarrësit.
Vendimi vendos gjithashtu disa filtra për përfituesit, duke përjashtuar organizatat që kanë përfituar fonde të ngjashme në tre vitet e fundit, si dhe duke kufizuar ndihmën totale për çdo ndërmarrje në 14 milionë lekë gjatë tre viteve. Ndërmarrjet përfituese do të kenë detyrimin të raportojnë përdorimin e fondeve dhe të respektojnë rregullat e ndihmës shtetërore.
Për zbatimin e skemës do të ngrihet një komision vlerësues nga ministria përgjegjëse, ndërsa Shërbimi Social Shtetëror do të luajë rol kyç në verifikimin dhe disbursimin e subvencioneve. Vendimi synon të forcojë ekonominë sociale dhe të krijojë më shumë mundësi punësimi për kategoritë më të ekspozuara, duke e kthyer mbështetjen financiare në një instrument konkret për përfshirje sociale dhe ekonomike./ekofin.al
