Të ardhurat nga primet e shkruara bruto të sigurimit për periudhën janar-maj 2022 kapën vlerën 7,7 miliardë lekë.
Referuar raportit të publikuar nga Autoriteti i Mbikëqyrjes Financiare (AMF), krahasuar me të njëjtën periudhë të një viti më parë, tregu shënoi rritje me 10.87 %.
Gjatë periudhës janar-maj 2022, numri i kontratave të sigurimit të lidhura arriti në 445,558 me një rritje prej 23.34 % krahasuar me të njëjtën periudhë të një viti më parë.
Tregu mbetet i orientuar tek sigurimet e Jo-Jetës, të cilat sollën 92.36 % të vëllimit të përgjithshëm të primeve, ndërsa sigurimet e Jetës kanë 7.50 %.
Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 42.95 % dhe primet e shkruara bruto të sigurimit të detyrueshëm zënë 57.05 % të totalit të tregut.
Ndërkohë, dëmet e paguara bruto në tregun e sigurimeve, arritën në rreth 2,709 milionë lekë, ose 13.83 % më pak se në periudhën janar-maj 2021.
Dëmet e paguara bruto në sigurimin motorik për periudhën janar-maj 2022 kapën vlerën 1,784 milionë lekë, duke pësuar një rritje me rreth 4.11 % krahasuar me të njëjtën periudhë të një viti më parë.
