Shqiptarët po lindin më pak dhe ky tashmë rrezikon të kthehet në një trend. Aq sa të kërcënojë edhe rritje natyrore të popullsisë. Të dhënat e fundit të INSTAT për treguesit demografikë dështojnë se në vitin 2024 numri i lindjeve shënoi rënie me rreth 5%, krahasuar me vitin 2023.
Në total në vitin 2024 u rregjistruan 22,425 lindje, përkundrejt 23,617 të raportuara në vitin 2023. Referuar tre-mujorëve, sipas publikimit të INSTAT, numri i lindjeve për tremujorin e katërt 2024 është 5.605, duke shënuar një rënie me 10,0 %, krahasuar me tremujorin e katërt 2023.
Sa i përket vdekjeve, ato shënuan një rënie të lehtë krahasuar me vitin 2023. Në total, në vitin 2024, u regjistruan 21,247 vdekje, përkundrejt 21,286 të vitit 2023.
Raporti mes linjdeve dhe vdekjeve, që nxjerr edhe shtesës natyrore të popullsisë për vitin 2024 ishte vetëm 1178, ndërkohë që në vitin 2023, ky raport ishte 2,331. Që me pandeminë, ky raport ka qëndruar në shifra shumë të ulëta, ndërsa që në periudhën parapandemisë, në vitin 2019, raporti ishte 6,624.
Në ndarjen gjeografike të lindjeve dhe vdekjeve, sigurisht që Tirana është qyteti që jep impaktin më të madh.
Ndërsa referuar ndarjeve sipas tre-mujorëve, në tremujorin e katërt 2024, të gjitha qarqet e vendit shënojnë ulje të numrit të lindjeve, në krahasim me tremujorin e katërt 2023. Qarku me numrin më të lartë të lindjeve është Tirana me 2.115 lindje, ndërsa qarku me numrin më të ulët është Gjirokastra me 83 lindje. Në tremujorin e katërt 2024, rënien më të vogël në përqindje të lindjeve e ka qarku i Shkodrës me 1,5 %, ndërsa rënien më të madhe e ka qarku i Korçës me 25,3 %, në krahasim me tremujorin e katërt 2023.
Në tremujorin e katërt 2024, dhjetë qarqe të vendit shënojnë ulje të numrit të vdekjeve, ndërsa dy qarqe të tjera shënojnë rritje, në krahasim me tremujorin e katërt 2023. Qarku me numrin më të ulët të vdekjeve është Kukësi me 99 vdekje, ndërsa qarku me numrin më të lartë është Tirana me 1.316 vdekje. Në tremujorin e katërt 2024, rënien më të madhe në përqindje të vdekjeve e zë qarku i Durrësit me 19,0 %, ndërsa rritjen më të madhe e ka qarku i Beratit me 13,2 %, në krahasim me tremujorin e katërt 2023. /ekofin.al
