Nuk kanë të ndalur problematiket në lidhje me sigurinë ushqimore. Burime për “Ora investigim” bëjnë me dije se gjatë muajit shkurt dhe mars 2025 qytetarët shqiptarë kanë konsumuar qumësht me aflatoksinë.
Aflatoksina është një toksinë e krijuar nga myku që rritet tek drithërat, misri dhe gruri. Kur lopët ushqehen me foragjere të kontaminuara aflatoksinë sekretohet më pas te qumështi që prodhojnë.
Konsumimi i qumështit me aflatoksinë ka pasoja të rënda në shëndetin e njeriut. Sipas OBSH-së aflatoksinë është kancerogjene e grupit 1, rrit rrezikun për probleme në mëlçi njëkohësisht dhe të veshkave.
Pas marrjes së informacionit se në dyqane dhe supermarkete është tregtuar qumësht me aflatoksinë televizioni “Ora News” i ka dërguar AKU një kërkesë për informacion. Ky institucion pranon se kompani të ndryshme kanë tregëtuar qumësht me aflatoksinë.
Sipas AKU gjatë muajit mars janë analizuar mostra qumështi të marra në mënyrë rastësore në tregëtim dhe në prodhim. Në bazë të analizave te kryera në ISUV disa kampione qumështi kanë rezultuar më prani të Aflatoksinës M1.
Pyetjes specifike të drejtuar nga “Ora News” se te cilat mostra qumështi ka rezultuar niveli i lartë i aflatoksinë, AKU nuk i jep përgjigje.
Çdo konsumator ka të drejtë të informohet se cilat janë kompanitë që tregtojnë qumështin që i rrezikon shëndetin, por ky informacion mbahet “sekret” nga AKU.
Aflatoksina dhe lidhja me rrezikun e kancerit
Qumështi është një nga burimet e rëndësishme të aflatoksinave në zinxhirin ushqimor të njeriut. Ndërsa në qumësht mund të jenë të pranishme si aflatoksina M1 ashtu edhe B1, e para gjendet rreth dhjetë herë më shumë. Duke marrë parasysh sasinë e mundshme të konsumit nga njeriu si dhe popullatën e ndjeshme, ekspozimi ndaj aflatoksinës M1 përmes konsumimit të qumështit ka qenë gjithmonë një shqetësim më i madh për shëndetin publik sesa aflatoksinat e tjera. Studimet vënë në dukje edhe lidhjen e aflatoksinave, sidomos ato të llojit M1 me sëmundjet kamcerogjene. /ora news
