Shqipëria po përballet me një ngadalësim të ndjeshëm në sektorin e prodhimit, i cili reflektohet drejtpërdrejt në të ardhurat fiskale të vendit për pesëmujorin e parë të vitit 2025. Të dhënat e Ministrisë së Financave tregojnë se TVSH në prodhim dhe tatim fitimi kanë shënuar rënie.
Referuar të dhënave të Administratës Tatimore nga fiskalizimi, qarkullimi pa TVSH (pa autongarkesën dhe pa borxhin e keq) për periudhën Janar-Maj 2024 ka qenë 1,482 milardë lekë dhe Janar-Maj 2025 është 1,515 miliardë lekë, pra 32.9 miliardë lekë më shumë.
Sektorët bazë të ekonomisë kanë rritje në qarkullim në krahasim me 5-mujorin e vitit 2024, evidentuar kjo nga rritja e TVSH-së bruto të deklaruar, me përjashtim të prodhimit, i cili shënon 6.6 miliardë lekë, me një ulje prej -4% ose -246 milionë lekë më pak. Sektori i prodhimit përbën një pjesë të rëndësishme të zinxhirit prodhues të ekonomisë, duke përfshirë një sërë aktivitetesh industriale, që nga industria ushqimore, përpunimi i qumështit dhe nënprodukteve të tij, prodhimi i tekstileve dhe veshjeve, deri te mobiljet, çeliku dhe materialet e ndërtimit. Një pjesë të konsiderueshme zë edhe prodhimi i energjisë, i cili ka shënuar rënie të ndjeshme gjatë këtij viti, duke sjellë edhe përkeqësimin e shifrave.
Të gjithë sektorët e tjerë janë me rritje. Kështu, TVSH bruto sipas sektorëve për 5-mujorin e 2025, krahasuar me 5-mujorin e vitit 2024, rezulton të jetë në sektorin e ndërtimit 6.7 miliardë lekë, me një rritje prej 20% ose 1.1 miliardë lekë më shumë; në sektorin e shërbimeve 11.3 miliardë lekë, me një rritje 11% ose 1.1 miliardë lekë më shumë; në sektorin e tregtisë 11.8 miliardë lekë, me një rritje prej 8% ose 839 milionë lekë më shumë; në sektorin e transportit 976 milionë lekë, me një rritje prej 15% ose 127 milionë lekë më shumë;
TVSH bruto e arkëtuar në 5-mujorin 2025 është rreth minus 2,2 miliardë lekë më pak se plani ose -5.6%. Krahasuar me 5-mujorin 2024, të ardhurat nga TVSH bruto janë rreth 2.9 miliardë lekë më shumë ose 8.4%.
Po kështu, me ulje në sektorin e prodhimit paraqitet edhe tatim – fitimi, i cili rezulton me ulje – 23%. Të ardhurat e mbledhura nga tatimi mbi fitimin për 5-mujorin 2025 u realizuan në masën 28.5 miliardë lekë, 899 milionë lekë ose 3.3% më shumë se 5-mujori 2024, si dhe -1.8 miliardë lekë ose -5.9% më pak se plani i 5-mujorit 2025 për tatimin mbi fitimin. Nga analiza sipas sektorëve në nivel 5-mujori 2025 krahasuar me të njëjtën periudhë në 2024, rezulton se sektori i tregtisë ka shënuar rritje 20%; sektori i shërbimit paraqitet me rritje 13%; sektori i transportit me rritje 34%, dhe sektori i ndërtimit me rritje 12%. /ekofin.al
Artikull i Ekofin.al
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke
cituar “Ekofin.al”, shoqëruar me linkun e artikullit origjinal.
