Shqipëria mbylli përkohësisht kapitujt e negociatave për shkencën dhe kërkimin shkencor (25), arsimin dhe kulturën (26), si dhe marrëdhëniet me jashtë (30), gjatë konferencës së nëntë të anëtarësimit me Bashkimin Europian, të mbajtur më 14 korrik.
Kjo është hera e parë që Shqipëria mbyll kapituj negociues që nga nisja e procesit të anëtarësimit. Ky hap u bë i mundur pas vlerësimit pozitiv të kritereve të ndërmjetme në fushën e shtetit të së drejtës, të miratuar më herët gjatë këtij viti.
Mbyllja e përkohshme e kapitujve nënkupton se negociatat mund të rihapen, në rast se ndryshon përmbajtja e legjislacionit ose e politikave që mbulohen nga kapitulli përkatës, ndonëse kjo ndodh rrallë. Një vend duhet të mbyllë të 33 kapitujt përpara se të jetë gati për të nënshkruar traktatin e anëtarësimit me Bashkimin Europian.
Thomas Byrne, ministër shteti përgjegjës për çështjet europiane në Irlandë, vendi që mban Presidencën e Këshillit të Bashkimit Europian, deklaroi se kjo arritje dëshmon angazhimin e Shqipërisë dhe të BE-së për të vijuar rrugën e integrimit europian të vendit.
“E mirëpres fuqimisht këtë përparim të rëndësishëm dhe e inkurajoj Shqipërinë të vazhdojë në këtë rrugë me reformat thelbësore, në mënyrë që procesi të ecë përpara gjatë muajve të ardhshëm”, tha Byrne.
Komisionerja Europiane për Zgjerimin, Marta Kos, shkroi në platformën X se Bashkimi Europian pret tashmë nga Shqipëria që të ruajë ritmin dhe të intensifikojë reformat, veçanërisht në fushën e shtetit të së drejtës dhe luftës kundër korrupsionit, duke vijuar punën në mënyrë transparente, të përgjegjshme dhe gjithëpërfshirëse.
Shqipëria i mbylli kapitujt në kuadër të të ashtuquajturës “Super e Marta”, gjatë së cilës u zhvilluan katër konferenca anëtarësimi me vendet kandidate. Kjo ishte hera e parë që një numër i tillë konferencash zhvillohej brenda së njëjtës ditë që prej fillimit të viteve 2000.
Përveç Shqipërisë, Mali i Zi zhvilloi një konferencë për mbylljen e dy kapitujve negociues, ndërsa Ukraina dhe Moldavia hapën Grupkapitullin 6, që lidhet me marrëdhëniet me jashtë./Përshtati nga European Western Balkans, ekofin.al
